आईजीपीको आदेश लत्याएर फरार अपराधीलाई दाङ प्रहरीको संरक्षण

२३ चैत, दाङ । तत्कालीन वेष्टर्न डेभलपमेन्ट बैंक नारायणपुर शाखाबाट १८ करोड रूपैयाँ हिनामिना मुद्दामा फरार अपराधीलाई प्रहरीले पक्राउ गर्न आनाकानी गरेको छ । फरार अपराधी यज्ञ वलीलाई पक्राउ गर्न प्रहरीले आनाकानी गरेको समाचार सञ्चारमाध्यममा आएपछि प्रहरी प्रधान कार्यालयले  चासो देखाएर पक्राउ निर्देशन दिए पनि जिल्ला प्रहरी कार्यालय दाङले अटेर गरेको हो ।

आर्थिक चलखेल गरेर दाङका प्रहरी प्रमुख वीरबहादुर वली र डीएसपी राजन गौतमले आईजीपी बसन्त कुँवरको निर्देशनलाई लत्याएर फरार अपराधी वलीको बचाउमा लागेका हुन् । अदालतले वलीलाई पक्राउ गरेर बुझाउन सक्ने प्रावधान रहेको बताइरहँदा एसपी वली र डीएसपी गौतमले आनाकानी गरेर बचाउमा लागेका छन् ।

बैंकको १८ करोड हिनामिनामा मुछिएका अभियुक्त कांग्रेस नेतालाई एसपी र डीएसपीले संरक्षण  गरेको समाचार यसअघि प्रकाशन भएको थियो । प्रहरी स्रोतका अनुसार एसपी र डीएसपी अवकाश हुने समय छोटो रहेकाले उनीहरु कमाउधन्दामा लागेका छन् । डीएसपी गौतम यसअघि जिप्रका दाङको मुद्धा फाटमा लामो समय बसेकाले उनको सेटिङमा एसपीले साथ दिँदै अवैध काम भइरहेको छ ।

प्रहरी प्रधान कार्यालयका केन्द्रीय प्रहरी प्रवक्ता पोषराज पोखरेलले नै  नव नियुक्त आईजीपी वसन्तबहादुर कुँवरले फरार अभियुक्तलाई प्रहरीबाट भइरहेको संरक्षण बारे चासो प्रकट गरेको र तत्काल प्रहरी परिचालन गरेर नियन्त्रणमा लिएर अदालतमा बुझाउन निर्देशन दिइसकेको बताए पनि आदेशको कार्यान्वयन गर्नुको साटो प्रहरी प्रमुख फरार अभियुक्तलाई खुलेआम संरक्षण गर्न लागि परेका छन् । प्रहरी प्रधान कार्यालयमा आफूले मिलाइहाल्ने भन्दै आईजीपीकै आदेश लत्याएर कानुनी कारवाही हुनबाट बचाएपछि एसपी वलीको चर्को आलोचना भइरहेको छ ।

यसअघि पनि स्कुटर चोरी प्रकरणमा चोरलाई मुद्दा नचलाई छाडेको घटना बारेमा जानकार रहेको र प्रतिवेदन हेडक्वार्टर आइसकेकाले त्यसमा संलग्नलाई पनि दाङ प्रहरी बचाएको आरोप छ । कांग्रेस दाङका पूर्वजिल्ला सदस्यसमेत रहेका वलीलाई बैंक हिनामिना प्रकरणमा म्याद तामेल गर्दा पनि म्याद गुजारेर बसेको अदालतले ठहर गरेको थियो ।

दाङ कांग्रेसको उपसभापतिमा प्रतिस्पर्धा गरेका उनलाई प्रमुख एसपी वीरबहादुर वलीले संरक्षण गर्दै आएको आरोप लागेको छ । एसपीको पावर देखाउँदै उनी मुद्दा मिलाउन जिप्रका दाङसहित जिल्ला सरकारी वकिल कार्यालय धाउने गरेका छन् । उच्च अदालत तुलसीपुरका शाखा अधिकृत गोकर्ण वलीले मुद्दा परेका वली हाजिर नभएकाले मुलतबीमा राखिएको र प्रहरीले वलीलाई पक्राउ गरेर अदालतमा ल्याए प्रक्रिया अनुसार अघि बढ्ने बताएका छन् । उनले बैँक हिनामिनामा संलग्न फरार अभियुक्त अहिलेसम्म अदालतमा हाजिर नभएको पनि बताए ।

याे पनि..................

चोरलाई डीएसपीकै निर्देशनमा मुद्दा चलाउन नदिएको छानबिन समितिको निष्कर्ष

दाङमा स्कुटर चोरी प्रकरणः एसपीको संयोजकत्वमा छानविन समिति