एसईई परीक्षामा पक्राउ पर्ने ‘नक्कली परीक्षार्थी’को संख्या २ सय नाघ्यो

२३ चैत, विराटनगर । जारी एसईई परीक्षामा अर्केको नाममा परीक्षा दिने नक्कली परीक्षार्थी पक्राउ गर्ने क्रम रोकिएको छैन । हालसम्म २०१ जनालाई नक्कली परीक्षार्थीको आरोपमा प्रहरीले पक्राउ गरिसकेको मोरङ प्रहरीले जनाएको छ । 

जिल्ला प्रहरी कार्यालय मोरङका प्रवक्त डिएसपी रञ्जन दाहालका अनुसार बुधबार र बिहीबार गरी २०१ जना पक्राउ परिसकेका छन् । जिल्ःलामा बुधबार सुस्मिता लिम्बूसहित २ जना मात्र पक्राउ परेका थिए । 

प्रहरीका अनुसार ग्रामथान गाउँपालिका– २ मा रहेको सरस्वती माध्यमिक विद्यालय परीक्षा केन्द्रबाट आज बिहान ५२ जना पक्राउ परेका छन् । 
केराबारी गाउँपालिकामा रहेको  सार्वजनिक माविबाट आज अर्कैको नामबाट सामाजिक विषयको परीक्षा दिइरहेका अवस्थामा १ सय २७ र सुन्दरहैचाको  जनता माविबाट २० जना नक्कली परिक्षार्थी पक्राउ गरेको हो । पक्राउ पर्नेहरुमा आफ्नो परीक्षा दिन लगाउने र दिने रहेका छन् । 

ग्रामथान गाँउपालिकास्थित सरस्वती माविमा २ सय ९२ जना विद्यार्थीले परीक्षा दिदैछन् । सुन्दरहरैंचा नगरपालिकाको जनता मावि मा ३ सय ११ जनाले परीक्षा दिँदै आएका छन् । नक्कली परीक्षार्थीले आफ्नो जन्ममिति र ठेगाना समेत भन्न नसकेको बताउँछन् । उनीहरुले परीक्षा फारम भर्दा एउटाको फोटो र प्रवेश पत्रमा अर्को फोटो राखेको पाइएको प्रहरीको दाबी छ । 

नक्कली परीक्षार्थी संचालन गर्न ठूलै गिरोह सक्रिय रहेको प्रहरीको अनुमान छ ।