परराष्ट्र सचिव पौड्याल र चिनीयाँ विदेशमन्त्री छिन काङबीच बेइजिङमा भेटवार्ता

२३ चैत, काठमाडौं । परराष्ट्र सचिव भरतराज पौड्यालले चिनियाँ परराष्ट्र मन्त्री छिन काङसँग बेइजिङमा भेटवार्ता गरेका छन् ।

नेपाल–चीन द्विपक्षीय कूटनीतिक परामर्श संयन्त्रको बैठकमा भाग लिन बुधबार बेइजिङ पुगेका परराष्ट्र सचिव पौड्यालले चिनियाँ परराष्ट्रमन्त्री समेत रहेका स्टेट काउन्सिलर छिनसँग बिहीबार भेटवार्ता गरेका हुन् । 

नेपाल–चीनबीच द्विपक्षीय कूटनीतिक परामर्श संयन्त्रको १५औं बैठक बेइजिङमा शुक्रबार हुँदैछ । परराष्ट्र् सचिव पौड्याल नेपाली टोलीको नेतृत्व गर्दै बेइजिङ पुगेका हुन् ।

भेटवार्तामा नेपाल–चीनबीच लामो समयदेखि चल्दै आएको द्विपक्षीय सम्बन्ध र सहयोगलाई अझ सुदृढ बनाउने, भ्रमण आदानप्रदान, विकास सहयोग, व्यापार, लगानी र पर्यटनलगायतका विषयमा छलफल भएको बेइजिङस्थित नेपाली राजदूतावासले जनाएको छ । 

सो भेटमा चीनका लागि नेपालका राजदूत विष्णु पुकार श्रेष्ठ लागयत दुवै देशका परराष्ट्र मन्त्रालयका वरिष्ठ अधिकारीको उपस्थित थिए । 

हरेक दुई वर्षमा हुने संयन्त्रको बैठक यसअघि कोरोना महामारीका कारण भर्चुल माध्यमबाट भएको थियो । महामारी घट्दै गएपछि यसपटक भौतिक उपस्थितिमा बैठक हुन लागेको हो ।