‘हात्तीको सूँड काटिनु मानवताविरुद्धको अपराध’

२४ चैत, काठमाडौं । शुक्रबार बसेको प्रतिनिधिसभाको बैठकमा रास्वपाका सांसद् विराजभक्त श्रेष्ठले चितवनको सौराहमा हात्तीको सूँड काट्ने व्यक्ति पत्ता लगाइ कारबाहीको माग गरेका  छन् ।

संसद्को शून्य समयमा बोल्दै सांसद श्रेष्ठले हात्तीको सूँड निर्मम तरिकाले धारिलो हतियार प्रहार गरी क्षति पुर्याएको भन्दै घटनाप्रति सरकारको ध्यानाकर्षण गराए । उनले दोषी पत्ता लगाइ कठघरामा उभ्याइ कडा सजाय दिन माग गरे ।

‘हात्तीको सूँडमा निर्मम तरिकाले धारिलो हतियार प्रहार भएको छ । राष्ट्रिय निकुञ्ज तथा संरक्षण ऐन २०२९ को दफा २६ (१) अनुसार कारबाही गर्न माग गर्छु’ सांसद श्रेष्ठले भने । उनले सूँड काटिनु मानवताविरुद्धको अपराध भएको बताए । 

यही बुधबार चितवनको सौराहमा ४५ वर्षकी चञ्चलकलीको सूँड काटेर छेदन गरिएको थियो । छेदनको घटनामा संलग्नलाई अहिलेसम्म पक्राउ गरिएको छैन ।