गोनाही नगरपालिका मेयर साहलाई पक्राउ गर्ने बाटाे खुल्याे

२४ चैत, काठमाडौं । नक्कली परीक्षार्थी राखेर एसईई परीक्षा दिएको अभियोगमा रौतहटको देवाही गोनाही नगरपालिकाका मेयर प्रेमलाल साह कानूविरुद्ध पक्राउ पूर्जी जारी भएको छ । प्रहरीको निवेदनमा जिल्ला अदालत रौटहटले पक्राउ पुर्जी जारी गरेको छ । यससँगै मेयर साहलाई पक्राउको तयारीमा प्रहरी लागेको छ । 

उनको नाममा मौलापुर नगरपालिकाको लक्ष्मीनियाँ मावि केन्द्रमा परीक्षा संचालन भइरहेको एसईईमा नियमिततर्फका परीक्षा दिंदै गरेका नक्कली परीक्षार्थी सोही जिल्लाको गरुडा नगरपालिका–६ पोठियाहीका कमल साह आइतबार पक्राउ परेपछि उनको कर्तुतको भेद खुलेको थियो । त्यसपछि कानूनबमोजिम जिल्ला अदालतबाट पक्राउ अनुमति लिन प्रहरीले अदालतमा निवेदन दिएको थियो । 

घटनाबारे छानबिनका लागि बाटो खुलेको र मेयर साहलाई छिट्टै पक्राउ गरिने जिल्ला प्रहरी कार्यालय रौतहटका उपरीक्षक वीरबहादुर बुढामगरले बताए । पक्राउ परेका कमल रेडियो नेपालको बर्दिवास शाखामा पाचौ तहमा कार्यरत स्थायी कर्मचारी रहेको पाइएको छ । अभियुक्त कमलले मेयर साहले नै आफूलाई परीक्षा दिन लगाएको स्वीकार गरेको प्रहरीको भनाइ छ । परीक्षा दिइरहेका कमलमाथि शंका लागेर चेकजाँच गर्दा उनी मेयर साहको सट्टा परीक्षामा सामेल भइरहेको पत्ता लागेको थियो । कमल नाताले कानूको ज्वाइँ हुन् ।

यही बुधबार र बिहीबार गरी मोरङको सुन्दरहरैँचालगायत क्षेत्रका परीक्षा केन्द्रहरुबाट २ सय भन्दा बढी नक्कली परीक्षार्थी पक्राउ परेका थिए । उनीहरुमाथि अनुसन्धान भइरहेको प्रहरीले जनाएको छ । अापफ्नाे परीक्षा अरू व्यक्ति लगाएर परीक्षा दिन लगाउने सक्कली परीक्षार्थीहरु पनि पक्राउ पर्ने क्रम जारी रहेको प्रहरीले जनाएको छ ।

शिक्षा ऐन २०२८ को दफा १७ मा नक्कली परीक्षार्थीबाट जाँच दिन लगाउने र दिने दुवैलाई ६ महिना कैद वा १ लाख रुपैयाँ जरिवाना वा दुवै हुन सक्ने व्यवस्था छ ।