मेयर बालेनलाई गैरीगाउँ सुकुम्वासी बस्तीमा अवरोध

२४ चैत, काठमाडौं । काठमाडौं महानगरपालिकाका मेयर बालेन्द्र साह (बालेन)लाई गैरीगाउँमा रहेको सुकुम्वासी बस्ती हटाउने कार्यमा पनि अवरोध गरेका छन् ।

शुक्रबमर तीनकुनेनजिक पर्ने गैरीगाउँको सुकुम्बासीका बस्ती खाली गराउन महानगरका सुरक्षाकर्मीसहित पुगेको डोजरलाई बस्तीका मानिसहरुले बाटो बन्द गराएर रोकेका छन् । 

महानगरपालिकाका मेयर बालेनले सुकुम्बासीको नाममा अवैध रुपमा बस्ती बसाएको भन्दै त्यहाँका संरचना भत्काउन दिउँसो डोजर पठाएका थिए । तर सयौंको संख्यामा जम्मा भएका ‘सुकुम्वासी’हरुले बस्ती पुग्ने बाटोमै आएर ढुंगा, बाँस जम्मा गराएर बाटो बन्द गराएका छन् । उनीहरूले टायर बालेर मेयर साहकाे चर्काे विराेध गरिरहेका छन् । हातमा लाठी, ढुंगा लिएर उनीहरू सडकमा निस्किएका छन् । अहिले उक्त क्षेत्रमा सुरक्षाका लागि नेपाल प्रहरी समेत परिचालन गरिएको छ ।

यसअघि थापाथलीस्थित बाग्मती किनारामा रहेका करिब ३ सय बढी ‘सुकम्वासी’लाई अवैध बस्तीबाट हटाउन डोजर चलाउन गरिएको बालेनको प्रयास सफल हुन सकेको छैन । त्यहाँको बस्ती हटाउन डोजरसहित पुगेका महानगरका प्रहरीमध्ये २५ जना बस्तीका मानिसहरुबाट भएको संघातिक आक्रमणबाट घाइते भएका थिए । पछि महानगरको उजुरीमा दुई जना आक्रमणकारीलाई प्रहरीले पक्राउ गरेको थियो ।