नक्कली परीक्षार्थी पक्राउपछि माेरङमा २४८ जना परीक्षामा अनुपस्थित

२४ चेत, विराटनगर । जारी एसईई परीक्षाका क्रममा २ सयभन्दा बढी संख्यामा ‘नक्कली’ विद्यार्थी पक्राउ परेपछि शुक्रबार मोरङका विभिन्न परीक्षा केन्द्रमा गरी २४८ जना परीक्षार्थी अनुपस्थित भएका छन् ।

बुधबार र बिहीबार दुई दिनमा जिल्लाका सुन्दरहरैचा, सरस्वती माध्यमिक विद्यालय  ग्रामथान,  सार्वजनिक माबी  केराबारी, सूर्योदय माबी कदमाह  र सरस्वती माध्यमिक विद्यालय दादरबेरियासहित ५ वटा परीक्षा केन्द्रमा शुक्रबार यो संख्यामा एसईईका परीक्षार्थी अनुपस्थित भएका हुन् ।  

अनुपस्थितमध्ये १७९ जना खुला शिक्षा तर्फका परीक्षार्थी रहेका छन् । एसईईको आज अनिवार्यतर्फ स्वास्थ्य, जनसंख्या तथा वातावरण शिक्षाको परीक्षा थियो ।

१७९ जना खुला शिक्षा अन्तर्गतका परीक्षार्थी अनुपस्थित रहेको पाइएको शिक्षा समन्वय इकाई  मोरङका प्रमुख टंक गौतमले जानकारी दिए ।
पाँच वटा परीक्षा केन्द्रमा गरी जम्मा २४८ अनुपस्थित रहेको पाइएको जिल्ला प्रहरी कार्यालय मोरङका प्रवक्ता डिएसपी रञ्जन दाहालले बताए । 
सुन्दरहर्रैचालगायत क्षेत्रका केन्द्रबाट बिहीबार एकैदिन १९९ जना नक्कली परीक्षार्थीलाई पक्राउ परेका थिए । सुनसरीका सुस्मिता लिम्बूसहित दुई जनालाई बुधबार कल्पना लिम्बूको नाममा अनिवार्य विज्ञान विषयको परीक्षा दिइरहेको अवस्थामा पक्राउ परेका थिए । 

सबैभन्दा बढी केराबारी गाउँपालिकामा रहेको  सार्वजनिक माविबाट १ सय २७ र त्यसपछि ग्रामथान गाउँपालिका–२ स्थित सरस्वती माध्यमिक विद्यालय परीक्षा केन्द्रबाट ५२ जना नक्कली परीक्षाको आरोपमा पक्राउ परेका थिए । एक विषयको परीक्षा लेखिदिएबापत ३ हजार रुपैयाँसम्म लिने गरिएको पक्राउ परेका नक्कली परीक्षार्थीहरुले बताएको प्रहरीको भनाइ छ ।

सुन्दरहरैँचाको जनता माध्यमिक विद्यालयबाट २० जना नक्कली परीक्षार्थी पक्राउ परेका थिए । नक्कली परीक्षर्थीले लेखेको सबै परीक्षा रद्द गरिने शिक्षा समन्वय इकाई मोरङ मोरङका प्रमुख गौतमले बताए । प्रहरीले सक्कली परीक्षार्थीहरुको पहिचान गर्ने र खोजी कार्य भइरहेको जनाएको छ ।

यता, रौतहटको गोनाही नगरपालिका मेयर प्रेमलाल साह कानूलाई जारी परीक्षामा ज्वाइँलाई नक्कली परीक्षा बनाएर आफ्नो परीक्षा दिन लगाएको आरोपमा छानबिन गर्न पक्राउका लागि जिल्ला अदालतले शुक्रबार अनुमति दिएको छ । उनको खोजी भइरहेको जनाइएको छ ।