अशक्त तथा आपाङ्गता भएका व्यक्तिलाई सीडीओ निरौलाले घरमै पुगेर दिइन् नागरिकता

२६ चैत, मन्थली । रामेछापकी प्रमुख जिल्ला अधिकारी (सीडीओ) अनिता निरौलाले अशक्त, अपंगता भएका र वृद्धवृद्धाका घरघरमै पुगेर नागरिता प्रमाणपत्र वितरण गरेकी छन् । नागरिकलाई सहज रुपमा सेवा दिने अभियानअन्तर्गत जिल्लाका रामेछाप नगरपालिका–४ हिमगंगाका फरक क्षमता भएका र वृद्धालाई घरमै नागरिकता प्रदान गरेकी हुन् । 

नागरिकलाइ सहजरूपमा सरकारी सेवा प्रदान गर्ने अभियानअन्तर्गत शनिबार फरक क्षमता भएका हिमगंगाका २५ वर्षीय नरबहादुर माझी र ७२ वर्षीय वृद्धा भक्तमाया सुनुवारलाई घरमै पुगेर नागरिकता प्रदान गरिन् । नागरिकता नहुँदा सुनुवारले सामाजिक सुरक्षा भत्ता पाउनबाट बञ्चित हुँदै आएकी छिन् । उनीहरुले सदरमुकाम मन्थलीस्थित सीडीओ कार्यालय पुग्न कठिन हुन नागरिकता प्राप्त गर्न सकेका थिएनन् ।  नागरिकता प्राप्तसँगै उनीहरुले सामाजिक सुरक्षा भत्ता पाउने बाटो खुलेको छ । 

प्रजिअ निरौलाले आफू जिल्लावासीको सेवा गर्न दुर्गम जिल्ला रामेछाप आएको बताइन । नागरिकलाई सहजरुपमा सेवा पुर्याउने कुरामा प्रतिवद्ध रहेको बताउँदै जिल्लाका अन्य पालिका तथा वडाहरुमा अशक्त तथा आपाङ्गता भएका व्यक्ति भए, घरमै गएर सेवा प्रदान गर्ने बताउँदै त्यस्ता व्यक्ति बारे जानकारी दिन आग्रह गरिन् । 

रामेछाप नगरपालिकाका नगर उपप्रमुख बालकुमारी कार्कीले लामो समयको प्रयासपछि फरक क्षमता भएका नगरबहादुर माझी र ७२ वर्षीय वृद्धा भक्तमाया सुनुवारलाई घरमै पुगेर नागरिकता दिलाउन सफल भएको प्रतिक्रिया दिइन् । सीडीओ कार्यालयले बेलाबेला घुम्ती शिविरमार्फत संचालन गरेर गाउँगाउँमा नागरिकता वितरण गर्दै आएको छ ।