पोखरामा ब्रिजकोर्स सञ्चालनमा प्रतिबन्ध, विद्यालयबाटै किताब बिक्रीमा पनि बन्देज

२६ चैत, पोखरा । पोखरा महानगरपालिकाले महानगरभित्र कक्षा ११ को भर्नाको लागि शुल्क लिएर संचालन गरिने अतिरिक्त शैक्षिक कार्यक्रम (ब्रिज कोर्स)मा प्रतिबन्ध लगाएको छ । 

नगर शिक्षा परिषद् र नगर शिक्षा समितिको संयुक्त बैठकले महानगरपालिका क्षेत्रमा त्यस्ता ब्रिज कोर्स चलाउन रोक लगाउन निर्णय गरेको हो । 

साथै बैठकले विद्यालय हाताभित्रबाट पाठ्यपुस्तक तथा शैक्षिक सामग्री बिक्री–वितरण गर्न रोक लगाएको छ । महानगरभित्र सञ्चालित विद्यालय शिक्षालाई व्यवस्थित तथा प्रभावकारी बनाउन यस्तो निर्णय लिएको महानगरका मेयर धनराज आचार्यले बताए ।

बैठकबाट सार्वजनिक गरेको निर्देशिकामा विद्यालय शिक्षा नियमावलीमा उल्लेखित शीर्षकबाहेक एउटै विद्यालयमा अध्ययन गर्दा  अध्ययन अवधिभर भर्ना शुल्कवापत् अधिकतम् २ महिनाभन्दा बढीको शुल्क लिन नपाइने, शैक्षिक सत्र २०८० को पठनपाठन वैशाख १० गतेबाट सुरु गर्नुपर्ने निर्णय लिएको छ । 
यस्तै विद्यालय आफैँले किताब किताब बेच्न नपाउने निर्णय भएको छ ।

विद्यालय क्षेत्रको सय मिटर दूरीभित्र सूर्ती तथा मदिराजन्य वस्तु बिक्री वितरण गर्न पनि निषेध गरिएको पालिका कार्यालयले जनाएको छ । विद्यलाय बस संचालन गर्नेबारे पनि नयाँ निर्णय लिइने कार्यालयले जनायो । साथै २० वर्षभन्दा पुराना सवारी साधन विद्यार्थी बोक्ने काममा प्रयोग गर्न नपाउने निर्णय पनि गरेको छ ।
विद्यालय आफैँले किताब बेच्ने गरेको गुनासो बढेपछि पोखरा महानगरपालिकाले विद्यालय आफैले किताब बेच्न नपाउने निर्णय गरेको छ । एसईई सकेलगत्तैदेखि विभिन्न शैक्षिक परामर्शदाता र ट्यूसन सेन्टरहरुले आगामी कक्षा ११ को भर्नामा सघाउ पु्याउन भन्दै चर्को शुल्क लिएर विभिन्न फ्याकल्टीमा ‘ब्रिज कोर्स’ संचालन गर्दै आएका थिए ।

महानगरकाे यस्ताे निर्णयले  शिक्षाकाे नाममा हुने लुटधन्दा कम हुने विश्वास  लिइएकाे छ । याे धन्दा काठमाडाैंमा बग्रेल्ती चल्दै आएकाे छ ।