२ करोड घुस मागेको अडियो सार्वजनिक भएपछि रास्वपाका सांसद श्रेष्ठ निलम्बित

२६ चैत, काठमाडौं । राष्ट्रिय स्वतन्त्र पार्टी (रास्वपा)ले मन्त्री बन्न दुई करोड मागेको भिडियो सार्वजनिक भएको घटनालाई लिएर सांसद ढाकाकुमार श्रेष्ठलाई निलम्बन गरेको छ । प्रधानमन्त्री पुष्पकमल दाहाल ‘प्रचण्ड’ नेतृत्वको सरकार पहिलोपटक विस्तार हुँदा पार्टीका तर्फबाट स्वास्थ्यमन्त्री बन्ने भन्दै उनले मेडिकल व्यवसायी दुर्गा प्रसाईंसँग २ करोड पैसा मागेको अडियो सार्वजनिक भएपछि रास्वपाले उनलाई निलम्बन गरेको हो ।

रास्वपा संसदीय दलका प्रमुख सचेतक सन्तोष परियारले अहिलेलाई उनलाई निलम्बन गरिएको र अनुशासन समितिले छानबिन गरेपछि उनलाई  थप कारवाही गर्ने बताए । श्रेष्ठले मन्त्री बन्ने भए साढे २ करोड बुझाउने पार्टी सभापति रवि लामिछानेले भनेको भन्दै मेडिकल व्यवसायी दुर्गा प्रसाइसँग कुराकानी गरेको अडियो सार्वजनिक भएपछि उनलाई लिम्बन गरिएको हो । 

रास्वपाका महामन्त्री डा. मुकुल ढकालले पनि अडियो आफूले पनि सुनेको र त्यसबारे सांसद श्रेष्ठलाई कारबाही प्रक्रिया थालिएको बताए । उनले यसबारे पार्टीले आफ्नो धारणा सार्वजनिक गर्न विज्ञप्ति जारी गर्ने तयारी भइरहेको बताए । यो विषयमा पार्टीको अनुशासन समितिलाई ७ दिनको समय दिएर छानबिन प्रतिवेदन तयार गर्ने समय दिइएको छ । सांसद श्रेष्ठलाई २४ घण्टे स्पष्टीकरण पनि सोधिएको छ । 

प्रधानमन्त्री पुष्पकमल दाहाल नेतृत्वको सरकारमा स्वास्थ्य तथा जनसंख्यामन्त्री आफ्नो पार्टीलाई भाग परेको श्रेष्ठले प्रसाईंलाई सुनाएका छन् । उनले प्रसाईंसँग दुई करोड रुपैयाँ व्यवस्थापन गरिदिन आग्रह गरेका छन् । उनले तत्काल एक करोड भएपनि मन्त्री बनाउन सभापति लामिछाने तयार रहेको प्रसाईंलाई सुनाएका छन् । प्रसाईंले दुई करोड रुपैयाँ व्यवस्थापन गरिदिने तर पछि आफ्नो काम गरिदिनुपर्ने शर्त राखेको अडियोमा सुनिएको छ ।