सिंहदरबारभित्रको फोहोर उठाउन बन्द

२६ चैत, काठमाडों । काठमाडौं महानगरपालिकाले सिंहदरबारको फोहोर आइतबारदेखि उठाउन बन्द गरेको छ । 

महानगरपालिकाको काममा सिंहदरबारबाट असहयोग भएको भन्दै मेयर बालेन्द्र साह (बालेन)ले शनिबार फोहोर नउठाउने सामाजिक सञ्जाल फेसबुकमार्फत घोषणा गरेसँगै सिंहदरबारको फोहोर उठाउन बन्द भएको हो । 

‘सिंहदरबारको फोहोरबारे वडामा छलफल नभएपनि रोकिएको जानकारी आफूलाई नभएको महानगरको ११ नम्बरका वडाध्यक्ष हिरालाल तण्डुकारले बताए । मेयर बालेनले फोन गरेर सिंहदरबारको फोहोर नउठाउन निर्देशन दिएपछि फोहोर नउठाएको फोहोर मैला व्यवस्थापन संघ स्रोतले जनायो । सिंहदरबारको फोहोर महानगरले उठाएर धादिङ र नुवाकोटको सीमा क्षेत्र बञ्चरेडाँडा व्यवस्थापन गर्दै आएको छ । 

मेयर साहले सरकारले महानगरको जनपक्षीय काममा असहयोग गर्दै आएको आरोप लगाउँदै आएका छन् । उनले थापाथली र गैरीगाउँको सुकुम्वासी बस्ती हटाउने महानगरको योजनामा सरकारले सहयोग नगरेको बताउँदै आएका छन् । दुवै स्थानमा सुकुम्वासीको नाममा अवैध वस्ती बसाएको भन्दै हटाउन महागरले गरेको पटकपटकको प्रयास सफल हुन सकिरहेको छैन । हटाउने महानगरको टोली डोजरसहित पुग्दा प्रतिकार गरेपछि पछि हट्दै आइरहेको छ । हटाउन सुरक्षाकर्मी उप्लब्ध गराउन साहले सरकारसँग बारम्बार आग्रह मात्र नभई पत्राचार समेत गर्दै आएका छन् । तर सरकारले नसुनेझै गर्दै आएको छ ।

महानगरले टुकुचा खोलामाथि बनाएका घर टहरा पनि हटाउन अभियानकै  रुपमा काम अगाडि बढाने खोजे पनि सफलता पाउन सकेको छैन ।

थापाथलीमा त महानगरका प्रहरी नै घाइते भएका थिए । प्रहरीलाई घाइते तुल्याउने आक्रमणकारीलाई कारवाही समेत नभएको भन्दै मेयर असन्तुष्ट छन् ।
गएको शुक्रबार गैरीगाउँस्थित वाग्मती किनारका अवैध बस्ती हटाउन खोज्दा बस्तीबाट भएको प्रतिकारका कारण महानगरको टोली डोजरसहित खाली हात फिर्ता हुनु परेको थियो । त्यसको दुई दिनपछि नै केन्द्र सरकारको प्रशासनिक केन्द्र सिंहदरबारभित्र जम्मा पारिएकाे फोहोर उठ्न छाडेको हो ।

फेसबुकमा साहले ‘आज बाट सिंहदरबारको फोहोर उठ्दैन । साच्चिकै देश सफा गर्नु परे त्यहाँका नेताहरुलाई सिस्डोलमा डम्प गर्नु पर्ने हुन्छ’ लेखेका थिए ।