मिटरब्याज पीडित र सरकारी टोलीबीच वार्ता सुरु

२६ चैत, काठमाडौं । मिटरब्याज पीडितहरुको नेतृत्व गरिरहेको किसान संघर्ष समितिद्वारा गठित टोली र सरकारी टोलीबीच वार्ता सुरु भएको छ ।

काठमाडौंको शान्तिवाटिकास्थित फल्चामा सुरु भएको हो । वार्ता जारी छ । वार्तामा मिटरब्याज पीडितको तर्फबाट टोलीले ६ बुँदे मागपत्र प्रस्तुत गरेको छ । जसमा फर्जी तमसुक र, मिटरब्याज पीडितविरुद्ध विभिन्न अदालतमा रहेका मुद्दा खारेज हुनुपर्ने, मिटर ब्याजी साहुका सम्पत्ति छानबिन हुनुपर्ने, पीडितलाई न्याय दिन फाक्ष्ट ट्याकबाट कानून बनाउनुपर्ने लगायत माग प्रस्तुत गरेका छन् । 

१८ चैतमा मिटरब्याज पीडितको एक समूहसँग सरकारले ५ बुँदे सहमति गरेपनि उक्त सहमति कमजोर भएको भन्दै २० चैतदेखि फेरि अर्को समूहमा आवद्ध भएर पीडितहरु काठमाडौंमा आएर आन्दोलन गर्दै आइरहेका छन् । 

उनीहरुसँग वार्ता गर्न गृह मन्त्रालयले सहसचिव प्रदीपकुमार कोइरालाको संयोजकत्वमा ५ सदस्यीय वार्ता टोली गठन गरेको छ । वार्तामा प्रहरी उपरीक्षक दिनेशराज मैनालीलगायत सदस्यहरु सहभागी छन् ।

समूहले गएको शुक्रबार सिंहदबारको मूल गेटमा प्रदर्शन गर्दा दर्जनौं पीडितहरु पक्राउ परेका थिए ।