मिटरब्याज पीडित र सरकारबीचको वार्ता भोलिसम्मका लागि स्थगित

२६ चैत, काठमाडौं । आइतबार शुरु भएको मिटरब्याज पीडित र सरकारी टोलीबीचको वार्ता भोलिसम्मका लागि स्थगित भएकोछ । आजको भएको वार्तामा कुनै ठोस छलफल हुन नसकेपछि भोलि सोमबार बस्ने गरी स्थगित गरिएको पीडित पक्षका वार्ता टोलीकाएक सदस्यले बताए । 

आजको वार्ता शान्तिवाटिकास्थित फल्चामा भएको थियो । वार्तामा पीडित पक्षको तर्फबाट टोलीले सरकारी वार्ता टोलीसमक्ष ६ बुँदे मागपत्र प्रस्तुत गरेको ति सदस्यले बताए । वार्ता भोलि हुने सरकारी वार्ता टोलीका सदस्य गृह मन्त्रालयका प्रवक्ता जितेन्द्र बस्नेतले बताए ।

पीडितको वार्ता टोलीको नेतृत्व मिटर ब्याज ठगीविरुद्ध संघर्षका लागि गठित किसान मजदुर संघर्ष समितिका अध्यक्ष अवधेश कुशवाहा र सरकारी टोलीको नेतृत्व गृह मन्त्रालयका सहसचिव प्रदीपकुमार कोइरालाले नेतृत्व गरिरहेका छन् । 

सरकारी वार्ता टोली ५ सदस्यीय रहेको छ भने पीडितहरुले भने १९ सदस्यीय बनाएका छन् । वार्तामा बस्न सानो संख्यामा चुस्त टोली बनाउन सरकारी टोलीले आग्रह गरेको छ ।