जन्मदर्ता गर्दा मावली थर लेख्ने परिपत्र सच्याइयो

२६ चैत, काठमाडौं । गृह मन्त्रालयअन्तर्गतको राष्ट्रिय परिचयपत्र तथा पञ्जीकरण विभागले बच्चाको जन्म दर्ता मावली थर प्रयोगबाट गर्न सकिने गरी ल्याएको प्रावभधान सच्याएको छ । विभागले ‘मावली थर’ राख्ने भनी व्यवस्था भएको ठाउँमा ‘बच्चा जन्मिँदा कायम आमाको थर र ठेगाना’ राख्न भनी सच्याएको हो । 

विभागले आइतबार परिपत्र सच्याएको हो । हालै मात्र विभागले स्थानीय तहलाई परिपत्र गरेर बाबुको ठेगाना खुल्न नसकेका बच्चाको जन्म दर्ता मावलीको थरबाट गर्न बनेको थियो । तर पछिल्लो पटक भने विभागले बच्चा जन्मिँदा कायम आमाको थर प्रयोग गर्ने भनिएको छ ।

पिताको थर खुल्न नसकेको अवस्थामा आमाको थरको सट्टा मावली थर राखेर बच्चाको जन्मदर्ता गरिदिने गरी यसअघि भएको परिपत्र आलोचित भएपछि विभाग पत्र सच्याउन विवश भएको हो । नयाँ व्यवस्थाअनुसार गर्न परिपत्र भइसकेको विभागले जनायो । 

नयाँ परिपत्रमा एकल आमाका बच्चालाई ‘पितृत्वको ठेगान नभएको’ भन्ने भाषा पनि हइटाएको छ । साथै आमा बुवाको सम्बन्ध विच्छेद भएर आमासँगै रहने बच्चाको जन्मदर्ता बाबुको ठेगानामा भएको रहेनछ भने आमाकै हालको ठेगाना कायम गर्न विभागका महानिर्देशक एवं केन्द्रीय पञ्जिकाधिकारी (रष्ट्रिार) रुद्रप्रसाद पण्डितले आइतबार देशभरका ६ हजार ७४३ वडा कार्यालयहरुलाई जारी गरेका परिपत्रमा उल्लेख छ ।