समिट अपार्टमेन्ट निर्माणले पुर्याएको क्षतिबारे छानबिन गर्न उपप्रमुखको नेतृत्वमा समिति गठन

२७ चैत, ललितपुर । ललितपुर महानगरपालिकाले समिट अपार्टमेन्ट घटनाबारे छानबिन गर्न उपप्रमुख मञ्जिला शाक्य बज्राचार्यको नेतृत्वमा समिति गठन गरेको छ । 

कुपण्डोल हाइटमा निर्माणधीन समिट अपार्टमेन्टसहितको १७ तले होटल समिट बनाउने क्रममा शुक्रबार राति वरिपरिको घर र जग्गा भासिएको थियो । घटनाबारे छानबिन गर्न महानगरले सोमबार समिति गठन गरेको हो । 

समितिमा सम्बन्धित वडाका दुई वडाध्यक्ष, पीडितका तर्फबाट ३ जना, समिटका प्रतिनिधि, महानगरका इन्जिनियर र प्रवक्ता छन् । समितिलाई क्षतिको विवरण संकलन, क्षतिपूर्ति वितरण र निर्माण कम्पनीलाई कारबाहीको सिफारिस लगायत कार्यादेश दिइएको छ ।

यसैबीच अपार्टमेन्ट निर्माण कम्पनी, ललितपुर महानगर र पीडितबीचको त्रिपक्षीय बैठकले एक करोड रुपैयाँको कोष बनाउने निर्णय गरेको छ । पीडिलाई सोही कोषबाट रकम दिइनेछ । 

यस्तै, अपार्टमेन्ट र होटलको नक्सा पाससमेत नगरेको र वातावरण प्रभावसम्बन्धी अध्ययन नै नगरी जबर्जस्त बनाउन खोजिएको पाइएपछि तत्काल निर्माण कार्य रोक्न महानगरले निर्देशन दिएको छ ।

उक्त अपार्टमेन्ट चौधरी ग्रुपको लगानीमा बनाउन लागिएको हो । अपार्टमेन्ट बनाउन अन्डरग्राउन्डका लागि माटो खन्दा निकै ठूलो खाडल बनेको र त्यसका प्रभावले वरपरका घरमा क्षति पुर्‍याउन थालेकाे छ । छिमेकीहरुले समयमै सचते गराउँदा समेत चौधरी ग्रुपले बेवास्ता गरेको भन्दै उनीहरु आक्रोशित बनेका छन् ।