सिंहदरबारको फोहोर उठ्ने विषय अझै अनिश्चित

२७ चैत, काठमाडौं । सिंहदरबार, राष्ट्रपति भवन, प्रधानमन्त्री तथा मन्त्रीनिवासको फोहोर उठ्ने विषय अझै अनिश्चित बनेको छ । काठमाडौं महानगरले केन्द्र सरकारमा रहेका भीईपीहरुबाट स्थानीय शासन संचालन र फोहोर उठाउने विषयमा असहयोग पुर्याउन नछाडेको भन्दै काठमाडौं महानगरका मेयर बालेन साहको निर्देशनमा आइतबारदेखि फोहोर उठाउन बन्द भएको हो । 

उपप्रधानमन्त्री एवं गृहमन्त्री नारायणकाजी श्रेष्ठसमक्ष फोहोर उठाउन बन्द भएपछि सोमबार बिहान मेयर बालेनलाई प्रधानमन्त्री र गृहमन्त्रीले बोलाएर छलफल गरेका छन् । तर छलफल निष्कर्षविहीन भएको छ । बालेनले छलफलपछि प्रधानमन्त्री प्रण्ड र गृहमन्त्रीसमक्ष १४ बुँदे विषय राखेको जानकारी सामाजिक संजालमार्फत दिएका छन् । 

उनले ५०० मिटरको दूरीमा रहेको महानगरपालिकाको समस्याबारे सुनवाइ गर्न केन्द्रीय निकायहरु मौन बसेको भन्दै आलोचना गरेका छन् ।सिंहदरबारभित्रका कार्यालयबाट फोहोर बाहिर निकालेर विभिन्न क्षेत्रमा जम्मा गरिएपनि सोमबार पनि त्यहाँ उठाइएको छैन । राष्ट्रपति भवन, प्रधानमन्त्री तथा मन्त्रीहरूको निवासमा पनि फोहोर उठाइएको छैन । यस क्षेत्रको फोहोर उठाउने ठेक्का परिवर्तन नेपाल नामक संस्थाले पाएको छ । महानगरको निर्देशन नआएकाले फोहोर नउठाएको उसको दाबी छ । 

सरकारसँग यसअघि भएका सहमति पालना नभएसम्म यस क्षेत्रका फोहोर नउठ्ने बालेनको सचिवालयले जनाएको छ । महानगरले शिक्षा, परराष्ट मन्त्रालयलगायत विभिन्न निकायहरुले मिचेको फुटपाथ हटाउनुपर्ने, महानगरको जग्गा उपभोगमा बाधा पुर्याएको लगायत मागबारे सरकारले बेवास्ता गरेपछि ध्यानाकर्षण गराउन फोहोर नपठाएको महानगरको भनाइ छ । 

केन्द्र सरकार र सम्बिन्धत निकायहरुको असमन्वयकारी भूमिकाले थुप्रिएको समस्याको चाङ सिंहदरबारले फोहोरमा देखोस् भनेर फोहोर नउठाइएको हो।’ मेयर साहले सोमबार फेसबुकमा स्टाटस लेखेका छन् ।