फोहोर उठाइदिन ठेकेदारलाई शीतलनिवासको फोन, सबै सरकारी कार्यालयमा ठप्प पार्ने योजनामा महानगर

२७ चैत, काठमाडौं । राष्ट्रपति कार्यालय शीतलनिवासमा ठेकेदारलाई फोन गरेर फोहोर उठाइदिन आग्रह गरेको छ । काठमाडौं महानगरपालिकाका मेयर बालेन साहको निर्देशनमा ठेकेदार कम्पनीले आइतबारदेखि फोहोर उठाउन कार्यमा रोक लागेपछि सोमबार फोन नै गरेर फोहोर उठाइदिन आग्रह गरिएको हो । साहकै निर्देशनमा शीतलनिवास, सिंहदरबार, प्रधानमन्त्री, मन्त्री कार्यालय र क्वाटरहरुको फोहोर उठाइएको छैन । 

सरकारले महानगरको विकास र महानगर सफाइ अभियानमा असहयोग गरेको भन्दै सरकारको ध्यानाकर्षण गराउन भन्दै अनिश्चितकालका लागि फोहोर उठाउन बन्द गरिएको साहको भनाइ छ । 

शीतलनिवास, सिंहदरबार लगायत क्षेत्रको फोहोर उठाउने ठेक्‍का परिवर्तन सेवा प्रालिले पाएको छ । तर प्रालिका संचालक साहले फोन गरेर त्यस क्षेत्रका फोहोर नउठाउन निर्देशन दिएपछि फोहोर थुप्रिएर दुर्गन्ध फैलिन थालेको छ । फोहोर नउठ्दा कार्यालय परिसरमा दुर्गन्ध फैलिएका भन्दै कार्यालयबाट फाेन आएकाे प्रालिले जनाएकाे छ । मेयर साहकै निर्देशनअनुसार फोहोर नउठाएको प्रतिक्रिया शीतलनिवासलाई दिएको मित्रप्रसाद घिमिरेले बताए ।

यसै बीच महानगरसँग भएको सहमति कार्यान्वयन नभए महानगरभित्रका सबै कार्यालयमा फोहोर उठाउन कार्य बन्द गर्ने योजनामा महानगर रहेको स्रोतको भनाइ छ । त्यसबाट पनि सरकार मौन बसे काठमाडौंका सबै नगरपालिकाले फोहोर नउठाउने कार्यक्रम ल्याउने बारे पनि छलफल चलिरहेको बताइन्छ ।