फोहोर उठाउनेबारे बालेन शाहसँग तत्काल वार्ता आग्रह

२७ चैत, काठमाडौं । नेपाली कांग्रेसका महामन्त्री एवं सांसद गगन थापाले प्रधानमन्त्री पुष्पकमल दाहाल ‘प्रचण्ड’लाई काठमाडौं महानगरपालिकाका मेयर बालेन शाहसँग तत्काल वार्ता गर्न आग्रह गरेका छन् ।

मेयर बालेन शाहले संघीय सरकारप्रति असहमति प्रकट गर्दै सिंहदरबारभित्रको फोहोर नउठाउन निर्देशन दिएपछि फोहोर उठ्न नसकेको भन्दै समस्या समाधान गर्न वार्ता गर्न आग्रह गरेका हुन् । 

सोमबार प्रतिनिधिसभाको आकस्मिक समयमा बोल्दै सांसद थापाले समस्या सुल्झाउन तत्काल प्रमुख बालेन शाहसँग वार्ता गर्न प्रधानमन्त्री प्रचण्डलाई आग्रह गरे ।

‘प्रधानमन्त्रीलाई आग्रह मेरो आग्रह छ, काठमाडौं महानगरपालिका प्रमुखसँग तत्काल वार्ता गरियोस्, जायज माग पूरा गरियोस्, वार्तामा काठमाडौंबाट निर्वाचित जनप्रतिनिधिलाई पनि सहभागी गराइयोस्’ उनले भने । महानगरले उठाएको माग सम्बोधन गर्न पनि उनले सरकारसँगको ध्यानाकर्षण गराए ।

प्रधानमन्त्रीले साहलाई सोमबार बिहान मात्र बोलाएर छलफल गरेका छन् । तर साहले सरकार गम्भीर नरहेको भन्दै सामाजिक संजालमार्फत महानगरको सरोकारका विषय बुँदागत रुपमै सार्वजनिक गरेका छन् । उनले ५०० मिटरको दूरीमा रहेको महानगरसँग केन्द्रीय निकायहरुले समन्वयनका लागि बेवास्ता गरिरहेको बताएका छन् ।