तनहुँ १ उपनिर्वाचनमा राप्रपा उम्मेदवार गुरुङ बैंकिङ कसुरमा दोषी ठहर

२६ चैत, काठमाडौं । राष्ट्रिय प्रजातन्त्र पार्टी (राप्रपा) की उम्मेदवार शोभा गुरुङ बैंकिङ कसुरमा अदालतबाट दोषी ठहर भएकी छन् । उच्च अदालत पाटनले चेक अनादरको मुद्दामा उनलाई दोषी ठहर गरेको हो । 

उच्च अदालत पाटनका न्यायाधीशद्वय ऋषिराम दवाडी र राजेन्द्र खरेलको संयुक्त इजलासले गुरुङलाई बैंकिङ कसुर दोषी ठहर गर्दै १० लाख रूपैयाँ क्षतिपूर्ति भराउने फैसला गरेको छ । 

बचत रकम नभएको खाली चेक दिएको आरोपमा चेकसहित लक्ष्मी कुमारी लिम्बुले गुरुङ विरुद्ध मुद्दा दायर गराएकी थिइन् । लक्ष्मीलाई १० लाख रूपैयाँ उपलब्ध गराउन र ४० हजार रूपैयाँ क्षतिपूर्ति कोषमा भराउन आदेश दिएको हो । 

उच्चको फैसला विरुद्ध गुरुङ सर्वोच्च अदालत जाने तयारीमा लागेको बताइन्छ । दोषी ठहर भएसँगै गुरुङको उम्मेदवारी के हुन्छ भन्ने बारे निर्वाचन आयोगले केही बताएको छैन ।