नेपालमा संक्रमितको संख्या दिनप्रति दिन बढ्दै, एकैदिन १२४ जनामा कोरोना पुष्टि

२७ चैत, काठमाडौं । नेपालमा पछिल्लो समय कोरोना भाइरस संक्रमितको संख्या दिनप्रति दिन बढ्दै गइरहेको छ । सोमबार मात्र कोरोना भाइरस संक्रमितको संख्या एकैदिन सय नाघेको छ । 

नेपालमा पछिल्लो २४ घण्टामा १२४ जनामा कोरोना संक्रमण पुष्टि भएको छ । ९०३ पीसीआर र १ हजार ६६३ एन्टिजेन गरी कुल २ हजार ५६६ जनाको परीक्षणमा ऊक्त संख्यामा संक्रमित देखिएका हुन् ।

पीसीआरमा ७७ र एन्टिजेन परीक्षणमा ४७ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । नयाँ भेरिएन्ट देखिएसँगै संक्रमितको संख्या केही हप्तायता बढ्दो क्रममा छ । हाल सक्रिय संक्रमितको संख्या ४४४ पुगेको छ । 

मन्त्रालयको नियमित कोभिड अपडेट अनुसार हाल संस्थागत आइसोलेसनमा २१ जना, आईसीयूमा १० जना र भेन्टिलेटरमा ४ जना रहेको देखिएको छ । 

 मन्त्रालयका अनुसार आजै मात्रै २९ जना कोरोनाबाट निको भएर घर फर्किएका छन् । कोरोना संक्रमण बढेसँगै स्वास्थ्य तथा जनसंख्या मन्त्रालयले कोरोना भाइरसविरुद्धको  पहिलो मात्रा, दोस्रो मात्रा र बुस्टर डोज लगाउन सबैमा आग्रह गरेको छ ।