चलचित्र ‘प्रसाद २’ को रिलिज रोक्न माग गरिएको रिट खारेज [आदेशसहित]

२७ चैत, काठमाडौं । फिल्म ‘प्रसाद २’ को रिलिज रोक्न अन्तरिम आदेशको मागसहित दायर रिट निवेदनलाई उच्च अदालत पाटनले खारेज गरिदिएको छ । 

चलचित्रको रिलिज रोक्न केशव पाण्डेले दायर गरेको रिटमाथि न्यायाधीश राजेन्द्र खरेल र विमल सुवेदीको संयुक्त इजलासले सोमबार सुनुवाइ गर्दै रिटमा माग भएबमोजिम अन्तरिम आदेश दिन अस्वीकार गरेको हो । 

केशव पाण्डेले निर्माता सुवास थापासँग भएको करार कार्यान्वयनका लागि अरु कानुनी बाटो अपनाउन सक्ने तर चलचित्रको प्रदर्शन रोक्न नमिल्ने आदेश दिएको हो । 

‘रिटबाट चलचित्र प्रदर्शन रोक्नु सुविधा सन्तुलनको दृष्टिले उपयुक्त नदेखिएकाले निवेदन माग बमोजिम अन्तरिम आदेश जारी गरिरहनु पर्ने अवस्था दे्खिएन’ उच्च अदालतको आदेशमा उल्लेख छ । साथै उच्चले यसअघि रिलिज रोक्न दिएको अल्पकालीन समेत आजको इजसाले खारेज गरिदिएको छ ।

‘प्रसाद २’ को प्रदर्शन २४ चैतमा हुने तय भएको थियो । तर पाण्डेले दायर गरेको रिटमाथि सुनुवाइ बाँकी हुँदा प्रदर्शन हुन सकेको थिएन । रिट खारेजसँगै अब रिलिजको बाटो खुलेको छ । 

चलचित्र निर्माणका बेला लागेको खर्च नदिएको भन्दै रिलिज रोक्न पाण्डेले रिट दायर गराएका थिए ।