सुदूरपश्चिममा विद्युतीय दुर्घटनाबाट ९ महिनामा ७ जनाको मृत्यु

२८ चैत, काठमाडौं । सुदूरपश्चिम प्रदेशमा विद्युतीय दुर्घटनामा ७ जनाको मृत्यु भएको तथ्यांक बाहिर आएको छ । चालु आर्थिक वर्षको ९ महिनामा ७ जनाको विद्युतीय दुर्घटनामा परेर मृत्यु भएको र ८ जना घाइते भएका छन् । घाइतेमध्ये २ जना धनगढी वितरण केन्द्रअन्तर्गत रहेका छन् ।

नेपाल विद्युत प्राधिकरणको धनगढी वितरण केन्द्रका प्रमुख सूर्यनारायण मण्डलले विद्युतमा परेर मृत्यु हुने क्रम नरोकिएको बताए । उका अनुसार कञ्चनपुरको महेन्द्रनगर विद्युत वितरण केन्द्र, अछाम वितरण केन्द्र, भजनी वितरण केन्द्र, बाजुरा वितरण केन्द्र, डडेल्धुरा वितरण केन्द्र, डोटी वितरण केन्द्र र बझाङ वितरण केन्द्र अन्तर्गत एक एक् जनाको मृत्यु भएको छ ।

धनगढी विद्युत वितरण केन्द्र अन्तर्गत २ जना चालु आवकाे चैतसम्ममा घाइते अवस्थामा छन् । यद्यपि उनले गत वर्षको तुलनामा विद्युतीय दुर्घटना कम हुँदै गएको दाबी गरे । 

विद्युतीय दुर्घटनाबाट ज्यान गुमाउनेमा विद्युत प्राधिकरणका कर्मचारी धेरै छन् । घाइतेहरु पनि प्राधिकरणकै कर्मचारी छन् । विद्युतीय संरचना विस्तारमा लापरवाही तथा उपकरण प्रयोगमा हुने त्रृटिले दुर्घटना हुने गरिएको प्रमुख मण्डलले बताए ।

दुर्घटना कम गर्न कर्मचारी थप सचेत हुनुका साथै उपभोक्तालाई विद्युतीय खतराबारे जागरण  ल्याउन आवश्यक रहेको उनको भनाइ छ । यसनिम्ति स्थानीय तह वडास्तरबाट सचेतनाका कार्यक्रम संचालन गर्नुपर्नेमा उनले जोड दिए ।