भरतपुर महानगरले थाल्याे निर्माण अलपत्र छाड्ने २८ ठेकेदार कम्पनीमाथि कारवाही

२८ चैत, चितवन । निर्माणको ठेक्का सम्झौता गरेर समयमा नै काम नसक्ने, बिचमा अलपत्र पारेर सम्पर्कमा नआउने निर्माण कम्पनीलाई भरतपुर महानगरपालिकाले कारवाही प्रक्रिया अगाडि बढाएको छ ।

महानगरपालिकाको नगरपालिका कार्यालयले मंगलबार एक सूचना जारी गर्दै तोकिएको समयमा काम नगर्ने र सम्पर्कमा नआई काम अलपत्र पार्ने कम्पनीहरुमाथि जमानत जफात, कालो सूचीमा राख्ने लगायत कारवाहीको प्रक्रियामा लैजाने जनाएको छ । सूचना प्रकाशित भएको ७ दिनभित्र कम्पनीका संचालक वा प्रतिनिधिलाई कार्यालयमा उपस्थित हुन भनिएको छ । धुलिखेल निर्माण सेवा, गर्जा कृशव जेवी, उर्जा मस्त जेवी, प्रदीप निर्माण सेवा, भूमिथान निर्माण सेवा, युविन कन्ट्रक्सन लगायत कम्पनीको नाममा सूचना जारी गरिएको छ । 

सम्पर्कमा नआउने कम्पनीहरुमाथि स्पष्टीकरणसहितको कारबाही प्रक्रिया अगाडि बढाउने उल्लेख छ । 

यी निर्माण कम्पनीहरुले अधिकांश कालोपत्रे सम्वन्धी कामको ठेक्का पाएका छन् । तर काम समयमा नसकेर अलपत्र पार्दै आएका छन् । सूचना जारी भएको मितिले ७ दिन भित्र आफैं उपस्थित भएर चित्तबुझ्दो जवाफ नदिएमा कानुन अनुसार कारर्वाही बढाउने सूचनामा भनिएको छ । 
महानगरले पटक पटक सूचना, लिखित र मौखिक निर्देशन दिँदा समेत ठेकेदारहरुले बेवास्ता गरेको जनाएको छ ।