भाषा मात्रै पढ्न जाने विद्यार्थीलाई एनओसी दिन राेक

२८ चैत, काठमाडौं । सरकारले भाषा मात्र पढ्न विदेश जान चाहने विद्यार्थीलाई नो अब्जेक्सन सर्टिफिकेट (एनओसी) नदिने भएको छ । यसका साथै प्लस टू पास गरेर विदेशमा अध्ययनमा जानेले मात्र एनओसी पाउनेछन् । 

शिक्षा मन्त्रालयले हालै ल्याएको निर्देशिकाले यस्तो व्यवस्था गरेको हो । निर्देशिका अनुसार अबदेखि कक्षा १२ पास नगरेका विद्यार्थी पढ्नका लागि विदेश जान पाउने छैनन् ।

प्रधानमन्त्री पुष्पकमल दाहाल ‘प्रचण्ड’ले शिक्षा मन्त्रालयसमेत जिम्मेवारी सम्हालेका बेला गएको फागुन १८ मा एनओसीमा कडाइपूर्ण व्यवस्थासहित निर्देशिका जारी गरिएको हो । निर्देशिका यही चैत १९ गतेदेखि लागु भइसकेको छ । नयाँ नियमअनुसार स्नातक र त्यसभन्दा माथिल्लो तह पढ्न विदेश जाने विद्यार्थीले अनुमति पाउने शिक्षा मन्त्रालयको उच्च शिक्षा महाशाखाले जनाएको छ । 

शाखाका अनुसार विदेशमा डिप्लोमा वा कुनै भाषा कोर्स गर्नका लागि मात्रै अबदेखि विद्यार्थी जान पाउँदैनन् । निर्देशिकामा योग्यता पुगेका विद्यार्थीका लागि एनओसी लिन सहजताका लागि अनलाइनबाट सेवा दिने व्यवस्था मिलाइएको छ । 

भाषा कोर्स र तालिम तथा डिप्लोमा पढ्न विदेश जान नदिने गरी सरकारले निर्देशिका ल्याएको भन्दै एजुकेशन कन्सल्टेन्सीहरूले भने असन्तुष्टि जनाएका छन् ।