गोंगबुबाट स्लोभाकिया पठाइदिने भन्दै १२ लाख ठगी गर्ने एक जना पक्राउ

२८ चैत, काठमाडौं । वैदेशिक रोजगारीको नाममा स्लोभाकिया पठाइदिने भन्दै १२ लाख ठगी गर्ने एक जनालाई प्रहरीले पक्राउ गरेको छ । पाँचथरको फाल्गुनन्द गाउँपालिका ३ घर भई ललितपुर महानगरपालिका–१४ नखिपोट बस्ने ४६ वर्षीय एकराज नेम्वाङलाई प्रहरीले गोंगबुबाट मंगलबार पक्राउ गरेको हो । 

उनले विजय लिम्बूलाई स्लोभाकिया पठाइदिने भन्दै १२ लाख रुपैयाँ लिएर सम्पर्कविहीन भएको प्रहरीले बताएको छ ।  प्रहरीका अनुसार एकराजले विजयलाई स्लोभाकियामा पुगेपछि कन्स्ट्रक्सन कम्पनीमा वेल्डिङको काम लगाइदिन्छु, मासिक दुई लाख रुपैयाँभन्दा बढी तलब हुन्छ भनी विश्वास दिलाएर पीडितबाट पटकपटक गरी १२ लाख रुपैयाँ लिएका हुन् ।

वैदेशिक रोजगार विभागबाट पक्राउ गरी उपस्थित गराइदिन पत्राचार भएसँगै कार्यालयबाट खटिएको विशेष प्रहरी टोलीले एकराजलाई गोंगबुबाट पक्राउ गरी थप अनुसन्धानका लागि वैदेशिक रोजगार विभाग बुद्धनगरमा पठाइएको राठौरले जानकारी दिए ।