युगान्डाको चार्टर उडान रद्दबारे वायुसेवा निगमले माग्यो माफी

२८ चैत, काठमाडौं । नेपाल वायुसेवा निगमको व्यवस्थापनले नेपाली सेनाका लागि काठमाडौंबाट अफ्रिकाको युगान्डामा चार्टर उडान गर्न नसकेकोमा माफी मागेको छ । 

निगमका प्रवक्ता तथा उपनिर्देशक रमेश पौडेलले मंगलबार विज्ञप्ति जारी गर्दै अफ्रिकी मुलुक इरिट्रियाले उसको आकाशमा उडान अनुमति नदिएकाले  तत्कालका लागि उडान नहुने जनाएका छन् । उडान रद्दबाट सम्बद्ध वर्गमा पर्न गएको असरप्रति उनले माफी मागेका छन् । 

निगमले ७७ जना नेपाली सेनाकालाई आइतबार राति युगान्डा पुर्‍याउने र त्यहाँबाट काज सकिएका ६७ जना सैनिकलाई नेपाल ल्याउन चार्टर उडानको तयारी गरेको थियो ।

चार्टर उडान काठमाडौंबाट दोहा हुँदै युगान्डा जाने तालिका थियो । दोहाबाट युगान्डासम्म पुर्‍याउने र त्यहाँबाट दोहासम्म ल्याउन दुई सेट पाइलटलाई पहिल्यै निगमले दोहाका होटलमा राखेको थियो । उडान नहुने भएपछि चार दिनअघि दोहामा पठाइएका चार जना पाइलट र छ जना क्याबिन क्रू मंगलबार बिहान काठमाडौं फर्काएका छन् । 

उडान रद्द बाध्यात्मक अवस्था भएको जनाएका छन् । संयुक्त राष्ट्र संघलगायत सम्बद्ध निकायहरुसँग पुनः समन्वय गरी उक्त उडान अर्को उपयुक्त समयमा गर्ने निगमले जनाएको छ । चार्टर उडान समय करिब २० घन्टाको थियो ।