एमालेले संसद् विघटनको दाउ हेरिरहेको माधव नेपालको दाबी

२९ चैत, काठमाडौं । सत्तारुढ दल नेकपा (एकीकृत समाजवादी)का अध्यक्ष माधवकुमार नेपालले नेकपा (एमाले) अहिले पनि संसद् विघटनको दाउ कुरिरहेको आरोप लगाएका छन् । 

बुधवार सुनसरीको इनरुवामा सञ्चारकर्मीसँगको भेटमा नेपालले एमाले संसद विघटन गरी मध्यावधी चुनावमा जाने दाउ हेरिरहेको र त्यसलाई आफूहरुले सफल हुन नदिने बताए । 

उनले एमाले नेतृत्वको प्रतिगामी अझै कायमै रहेको बताउँदै संविधान मिच्ने कामलाई आफूले समर्थन गर्न नसक्ने  बताए । एमालेसँग तत्काल एकताबारे नसोचेको समेत स्पष्ट पारे । 

मन, विचार र सिद्धान्त मिल्नेसँग भने एकता गर्नुपर्ने पक्षमा आफूहरु रहेको बताए । अहिलेकै अवस्थामा एमालेसँग पार्टी एकता सोच्न पनि नसकिने उनको भनाइ थियो । संविधान मिचेर संसद विघटनको मानसिकतालाई आफूहरुले नयाँ गठबन्धन बनाएर एक हदसम्म तोडिदिएको दाबी गरे ।