बैतडी जीप दुर्घटनाबारे संसदमा कुरा उठ्यो, पीडितलाई क्षतिपूर्ति माग

२९ चैत, काठमाडौं । मंगलबार राति बैतडीमा भएको भयानक जीप दुर्घटनाबारे बुधबार बसेको प्रतिनिधिसभाको बैठकमा सांसदहरुले कुरा उठाएका छन् ।

नेकपा (एकीकृत समाजवादी)का सांसद भानुभक्त जोशीले बैतडीको झौंलेकमा जीप दुर्घटनामा परी आफन्त गुमाएका पीडितहरुका लागि तत्काल उचित क्षतिपूर्तिको व्यवस्था गर्न सरकारसँग माग गरेका छन् । दुर्घटनामा परी बझाङको केदारस्युँ गाउँपालिका–५ बाज गाउँका ६ जनाको ज्यान गएको थियो । 

सांसद जोशीले रोजगारीका लागि भारतमा श्रम गरी बझाङ घर फर्किएनका मजदुरहरु सवार सो जीप दुर्घटनामा परी ६ जनाको ज्यान गएको बताउँदै पीडितलाई तत्काल क्षतिपूर्तिको उचित व्यवस्था गर्न गृह मन्त्रालयसँग माग गरे । मृतकहरुको शव बैतडीको पाटन अस्पतालमा राखिएको छ । उक्त दुर्घटनामा ५ जना घाइते भएका छन् । उचित क्षतिपूर्ति पाउनुपर्ने माग राख्दै मृतक परिवारले शव बुझन मानेका छैनन् । दुर्घटनाको छानबिन माग गरेका छन् । 

बझाङ जाँदै गरेको से १ ज ७६४ नम्बरको उक्त दुर्घटनामा बाजका काका ६१ वर्षीय मने बोहरासहित ३९ गोरख बोहरा, ४० वर्षीय नरे बोहरा, ४६ वर्षीय बिर्ख बोहरा, ४४ वर्षीय मानबहादुर धामी र ५० वर्षीय वीरे धामीको निधन भएको थियो । दुर्घटनामा जीप क्षतिग्रष्त भएको छ ।