निजामती कर्मचारी ऐन मस्यौदामा अर्थको राय लिने क्रम चलिरहेको छ : मन्त्री मोदी

२९ चैत, काठमाडौं । संघीय मामिला तथा सामान्य प्रशासन मन्त्री अमनलाल मोदीले संघीय निजामती सेवा ऐनको मस्यौदा तयार भएर रायका लागि अर्थ र कानून मन्त्रालयमा पठाएको बताएका छन् । 

बुधबार प्रतिनिधिसभाको बैठकमा शून्य समयमा सांसदहरुले संघीय निजामती सेवासम्बन्धी ऐन मस्यौदा कहिले आउँछ भन्नेबारे उठाएका प्रश्नको जवाफ दिँदै मन्त्रीले मोदीले जानकारी दिँदै सो कुरा बताएका हुन् । 

उनले सांसद सोबिता गौतमले उठाएका प्रश्नको जवाफ दिँदै काठमाडौं तिनकुनेस्थित जग्गाको मुअब्जा दिनेबारे छिट्टै नै सीडीओ अध्यक्षतामा बैठक बस्ने र सो बैठकले जग्गाको पुनर्मूल्यांकन गर्ने कि नगर्ने भन्नेबारे निष्कर्ष निकालिने बताए । उनले कर्मचारी सरुवा गरेको क्षेत्रमा जान नमान्ने र नेताले पनि कर्मचारी छानेर माग्ने गरिएको गुनासो गरे ।

उनले ऐनको मस्यौदा बनाउने काम पूरा भएकोले अर्थ मन्त्रालयको राय पाएपछि ऐन संसदमा ल्याउने बताए । उनले बाग्मती प्रदेशले निजामती कर्मचारी सेवा ऐनमा कर्मचारीको उमेर हद ६० राखेको, त्यो किताबखानाले नमान्ने भएकाले समस्या थपिएको बताए । यसमा संसदबाटै टुंग्याउनुपर्ने बताए ।