रौतहटको गरुडा नगरपालिकामा तालाबन्दीका क्रममा झडप, प्रहरीद्वारा हवाइ फायर

२९ चैत, काठमाडौं । गरुडा नगरपालिकाको कार्यालयमा तालाबन्दीको प्रयासलाई रोक्ने क्रममा भएको झडपमा ६ प्रहरी घाइते भएका छन् ।

झडप रोक्न प्रहरीले हवाई फायर गरेको थियो । यसअघि राखेका मागबारे नगरपालिकाले बेवास्ता गरेको भन्दै स्थानीय दीपक यादवको समूहले कार्यालयमा ताला लगाउन खोज्दा प्रहरीले रोकेको र सो क्रममा समूहका आएका युवाहरुले ढुंगामुढा प्रहार गरेका थिए । 

त्यसपछि भएको झडपमा प्रहरीले अवस्था नियन्त्रण बाहिर जान नदिन ४ राउण्ड हवाई फायर गरेको प्रमुख जिल्ला अधिकारी धर्मेन्द्र मिश्रले बताए । उनका अनुसार थुप्रै संख्यामा अश्रु ग्यास समेत प्रहार गरिएको थियो । 

ढुंगा प्रहारमा केही स्थानीय समेत घाइते भएका छन् । उनीहरुको स्थानीय स्तरमा उपचार भइरहेको बताएका छन् । घाइतेमध्ये एक युवककाे अवस्था गम्भीर रहेकाे जनाइएकाे छ ।