माग पूरा नभएसम्म सिंहदरबारको फोहोर नउठाउने काठमाडाैं महानगरकाे अडान

२९ चैत, काठमाडौं । काठमाडौं महानगरपालिकाले माग पूरा नभएसम्म सिंहदरबार, शितल निवास लगायत क्षेत्रकाे फोहोर नउठाउने अडान दोहोर्याएकाे छ ।

संघीय सरकार मन्त्रिपरिषद्को बैठकले साहका गतिविधिलाई अराजक भन्दै सचेत गराउने निर्णय गरेको भोलिपल्ट बुधबार मेयर साहले अघि सारेका मागलाइ महानगरले दोहोर्याएको हो । 

महानगर प्रमुख साहले सोमबार अघि सारेका १४ बुँदे मागबारे संघीय सरकार वार्तामा आएर पूरा गर्न तयार नभएसम्म सिंहदरबारको फोहोर नउठाउने निर्णयबाट पछि हट्न नसकिने वडा नम्बर ११ का अध्यक्ष हिरालाल तण्डुकारले स्पष्ट पारे । 

५०० मिटरको दूरीमा रहेको महानगरको जायज मागलाई सरकारले बेवास्ता गरेको जनाउँदै साहले सिंहदरबार, प्रधानमन्त्री र मन्त्री क्वाटर तथा राष्ट्रपति कार्यालय शितलनिवासको फोहोर आइतबारदेखि उठाएको छैन ।