प्रधानन्यायाधीश नियुक्तिको प्रक्रिया थाल्न कानुन व्यवसायीले गराए प्रधानमन्त्रीको ध्यानाकर्षण

३० चैत, काठमाडौं । सर्वोच्च अदालतमा प्रधानन्यायाधीश नियुक्तिका लागि प्रक्रिया अगाडी बढाउन नेपाल बार एशोसियसनले सरकारको ध्यानाकर्षण गराएको छ । बिहीबार विहान प्रधानमन्त्री पुष्पकमल दाहाल प्रचण्डसँगको भेटमा नेपाल बार एसोसिएसनका पदाधिकारीले ध्यानाकर्षण गराएका हुन् ।

प्रधानमन्त्रीको सरकारी निवास बालुवाटारमा भएको भेटमा नेपाल बार एसोसिएसनका पदाधिकारीहरू, पूर्वपदाधिकारीहरू र उपत्यकाका विभिन्न बार अध्यक्ष र पदाधिकारीहरू उपस्थित थिए । भेटमा प्रधानमन्त्री प्रचण्डले लोकतन्त्र र संविधानको रक्षा एवं न्याय प्रणालीमा सुधारका लागि बारले खेलेको भूमिकाको प्रशंसा गर्दै प्रधानन्यायाधीशको नियुक्त प्रक्रिया अगाडी बढाउने आश्वासन दिएका थिए ।  

छलफलमा बारका पदाधिकारीहरूले १४ महिनादेखि सर्वोच्च अदालतमा कायममुकायम प्रधानन्यायाधीश कायम रहेकाले तत्काल संवैधानिक परिषद्को बैठक राखी प्रधानन्यायाधीश नियुक्ति गर्न प्रधानमन्त्रीको ध्यानाकर्षण गराइएको थियो ।  बुधबार पत्रकार सम्मेलन गर्दै नेपाल बार एशोसिएसनले ७ देखि १० दिनभित्र प्रधानन्यायाधीश नियुक्त नभए आन्दोलन गर्ने घोषणा गरेको थियो ।

प्रधानमन्त्रीलाई भेटेपछि सञ्चारकर्मीहरुसँग कुरा गर्दै नेपाल बार एशोसिएसनका अध्यक्ष गोपालकृष्ण घिमिरेले प्रधानमन्त्री संवैधानिक परिषदको अध्यक्षसमेत भएकाले तत्काल प्रधानन्यायाधीश नियुक्तिको पहल लिन ध्यानाकर्षण गराएको बताए । प्रधानमन्त्री प्रचण्डले प्रधानन्यायाधीश नियुक्तिका लागि आफूले पहल गरिरहेको र चाँडै ठोस निस्कर्षमा पुग्ने बताएको पनि घिमिरेले जानकारी दिए ।

प्रधानन्यायाधीश नियुक्ति नहुँदा न्यायपालिकाको साख गिरेको महसुस गरेको र करिब १४ महिनादेखि कायममुकायम प्रधानन्यायाधीशबाट सर्वोच्च अदालत सञ्चालन गर्दा न्याय सम्पादनमा कठिनाइ भइरहेको बताए ।