मकवानपुरका सचिवले पनि छाडे अध्यक्ष लिङदेनलाई

३० चैत, काठमाडौं । राष्ट्रिय प्रजातन्त्र पार्टी (राप्रपा) मकवानपुरका जिल्ला सचिव विजयसिंह ठकुरीले पार्टी परित्याग गरेका छन् । 

सामजिक सञ्जाल फेसबुकमार्फत बिहीबार स्टाटस सार्वजनिक गर्दै ठकुरीले पार्टीको साधारण सदस्य समेत नरहने गरी पार्टी परित्याग गरेको जनाएका छन् । 

उनले पार्टीको विद्यार्थी संगठन राष्ट्रिय प्रजातन्त्रिक विद्यार्थी संगठन मकवानपुरका पूर्वअध्यक्ष, युवक संगठनको जिल्ला सचिव तथा पार्टीको जिल्ला कार्यसमितिको विभिन्न विभागमा रहेर जिम्मेवारी निर्वाह गरिसकेका छन् । 

‘राप्रपा युवक संगठन जिल्ला सचिव, विद्यार्थी संगठन जिल्ला अध्यक्ष हुँदै पार्टी प्रशिक्षण विभाग प्रमुख, रेडक्रस तथा स्वास्थ विभाग प्रमुख र जिल्ला सचिव हुँदै गर्दा साथ र सहयोग गर्ने र नगर्ने सम्पूर्णमा हार्दिक आभार व्यक्त गर्दै, आजबाट एक स्वतन्त्र देशभक्त नागरिक भयर बस्ने निर्णय गरेको छु’ उनले सामाजिक सञ्जालमा लेखेका छन् ।

उनले आफू आजबाट पार्टीको कुनैपनि पदमा नरहेको र साधारण सदस्यबाट समेत हटेको जनाएका छन्र । तर चुनावको बेला गरेको वाचाहरुप्रति सधैँ बफादार रहने कुरा शुभचिन्तकहरु समक्ष राखेका छन् ।

उनले पार्टी नेतृत्वसँग जिल्ला पार्टीको अवस्थाबारे निरन्तर संवाद गरेको र नेतृत्व जनताबाट टाढा हुँदै गएपछि पटकपटक असन्तुष्ट राख्दै आएका थिए ।राप्रपाका केन्द्रीय अध्यक्ष राजेन्द्र लिङदेन हुन् ।

यसअघि राप्रपा मकवानपुरका जिल्ला उपाध्यक्ष शंकरसिंह ठकुरीले हिजो मात्रै पार्टी छाडेका थिए ।