महासंघको वरिष्ठ उपाध्यक्ष पदमा दोस्रो चरणको निर्वाचन २ बजेदेखि

३० चैत, काठमाडौं । नेपाल उद्योग वाणिज्य महासंघको वरिष्ठ उपाध्यक्ष पदका लागि दोस्रोचरणको मतदान दिउँसो २ बजेदेखि हुने भएको छ । कुनै पनि उम्मेदवारले ५० प्रतिशत मत नकटाएपछि महासंघले दोस्रोचरणको मतदानको समय २ बजे तय गरेको हो । यसअघि बुधबार सम्पन्न निर्वाचनमा कुनै पनि उम्मेदवारले ५० प्रतिशत मत कटाउन नसकेपछि पुनः निर्वाचन हुन लागेको हो । 

पहिलो चरणको निर्वाचनबाट उमेशलाल श्रेष्ठ र अञ्जन श्रेष्ठ दोस्रो चरणमा प्रवेश गरेका छन् । रामचन्द्र संघाइ बाहिरिएका छन् । महासंघका अनुसार निर्वाचन प्रज्ञा प्रतिष्ठानमै हुने छ । पहिलो चरणको मतदानमा अन्जन श्रेष्ठले ३७.९९, उमेशलाल श्रेष्ठ ३१.९९ र रामचन्द्र संघाईले ३०.४६ मत पाएका थिए । महासंघमा वरिष्ठ उपाध्यक्षमा निर्वाचित हुन ५० प्रतिशतभन्दा बढी मत ल्याउनुपर्छ ।

अहिले चुनावी प्रतिस्पर्धामा रहेका वरिष्ठ उपाध्यक्षका उम्मेदवारहरुमध्ये कुनै एक उम्मेदवारले ५० प्रतिशतभन्दा धेरै मत प्राप्त गर्न नसकेपछि पुनः मतदान हुन लागेको हो  । महासंघको निर्वाचनमा जिल्लानगरतर्फ ५० प्रतिशत, एसोसिएटतर्फ ३० र वस्तुगततर्फ २० प्रतिशत मतभार हुने गर्छ । त्यसमध्ये जिल्लातर्फ अन्जनले बढी मत ल्याए । 

एसोसिएटतर्फ रामचन्द्रले बढी मत ल्याएका थिए । वस्तुगततर्फ उमेशलालले बढी मत ल्याए । मतभारका हिसाबले संघई बाहिरिएका हुन । अब हुने  चरणको निर्वाचनमा सबैभन्दा बढी मत प्राप्त गर्नेमध्येका दुई उम्मेदवार उमेशलाल श्रेष्ठ र अञ्जन श्रेष्ठबीच प्रतिस्पर्धा हुनेछ ।