सरकार र आन्दोलनरत मिटरब्याजपीडितबीचकाे वार्ता भंग, आन्दोलन थप सशक्त बनाउने उद्घाेष

३० चैत, काठमाडौं । मिटरब्याज पीडित र सरकारबीचको वार्ता भंग भएको छ । 

पीडितहरुको तर्फबाट मिटरब्याज तथा ठगीविरुद्ध किसान मजदुर संघर्ष समितिले समितिका अध्यक्ष अवदेश कुशवाहको नेतृत्वको टोलीले गृह मन्त्रालयका सहसचिव नेतृत्वको वार्ता टोलीसँग ५ दिनदेखि वार्ता गर्दै आइरहेको थियो । 

बुधबार साँझ गृहमन्त्री नारायणकाजी श्रेष्ठसँगै वार्ताको तयारी गरेपनि अन्तिम स्थगित भएपछि बिहीबार वार्ता भएको थियो । आज गृह मन्त्रालयमा भएको निर्णायक वार्ता सफल नभएको पीडितहरुले बताएका छन् ।

सरकारसँग उनीहरुले पीडकलाई कारवाही गर्न पीडितहरुसँगको छलफलबाट तत्काल कानून बनाउन मस्यौदा तयार पानुपर्ने, ऋण चुक्ता भएर पनि धरौटी सम्पत्ति जिन्सी फिर्ता गराउनुपर्ने लगायत ६ बुँदे माग प्रस्तुत गरेका छन् ।

सरकारी वार्ता टोलीले आफ्ना मागहरु सम्बोधन गर्न तयार नभएको भन्दै वार्ता भंग भएको वार्तामा सहभागी संघर्ष समितिका प्रवक्ता निर्ग नविनले बताए । आजदेखि सरकारले बनाएको वार्ता टोलीसँग वार्ता नगर्ने र वार्ता भंग भएकाे घाेषणा गर्याैं’ उनले भने । आफूहरुको अधिकारको आन्दोलन थप सशक्त बनाउने उनले बताए ।

माइतीघर मण्डलाबाट सूरू भएकाे वार्ता सिंहदरबारमा पुगेर भंग भएकाे हाे । तराइका विभिन्न जिल्लाबाट काठमाडाैं आएर आन्दोलन गर्ने क्रममा प्रहरीले गत शनिबार सिंहदरबार मुख्य गेटअगाडि बल प्रयोग गरेर धरपकड समेत गरेको थियो ।