अझै उठेन शीतलनिवास र सिंहदरबारको फोहोर

१ वैशाख, काठमाडौं । आज छैठौं दिन पनि राष्ट्रपति कार्यालय शीतलनिवास, प्रधानमन्त्रीनिवास बालुवाटार र सिंहदरबारको फोहोर उठेको छैन ।

काठमाडौं महानगरपालिकाले केन्द्र सरकार र मन्त्रालयहरुले आफ्नो मागलाई बेवास्ता गरेको जनाउँदै विरोधस्वरुप फोहोर उठाउन कार्य बन्द गरेको जनाउँदे आएको छ । महानगरका मेयर बालेन साहको निर्देशनमा परिवर्तन नेपाल प्रालिले आइतबारदेखि फोहोर उठाउन बन्द गरेको हो । फोहोर उठाउने ठेक्कामा सो संस्थाले उठाउँदै आएको छ । 

महानगरले नभनेसम्म फोहोर नउठाउने प्रालिका संचालक मित्र घिमिरेले बताए । सिंहदरबारभित्रका सबै कार्यालयबाट फाहोर उठाएर कम्पाउन्डभित्रै राखिएका छन् । महानगरका प्रवक्ता एवं ११ नं. वडा अध्यक्ष नवीन मानन्धरले सरकारले वार्ता गर्न नबोलाएसम्म सिंहदरबारबाट  फोहोर नउठ्ने स्पष्ट पारे । 

मेयर बालेनले गत शनिबार बिहान सामाजिक सञ्जालमा स्टाटस लेख्दै सिंहदरबारको काठमाडौं महानगरको विकास, सफाइ अभियानलाई असहयोग पुग्ने काम कायम रहेसम्म फोहोर नउठ्ने बताएका थिए । 

यद्यपि, फोहोर नउठाउने साहको अभिव्यक्ति नीतिगत विपरीत रहेको भन्दै मंगलबार बसेको मन्त्रिपरिषद्को बैठकले साहलाई जिम्मेवारी बोध गरेर काम गर्न सचेत गराएको थियो । त्यसको ४ दिन बितिसक्दा पनि फोहोर उठन सकेको छैन । फोहोर नउठेपछि दुर्गन्ध फैलिएको छ ।

संविधानको अनुसूची–८ मा फोहोरमैला व्यवस्थापन गर्ने अधिकार स्थानीय तहलाई दिइएको छ । साथै फोहोरमैला व्यवस्थापन ऐन २०६४ ले पनि फोहोरमैला उठाउने र व्यवस्थापन गर्ने अधिकार स्थानीय तहलाई दिएको छ।