गैंडाकोट-मौलाकालिका केबलकार संचालनमा, ८० वर्ष माथिकालाई भाडा नलाग्ने

१ वैशाख, काठमाडौं । नवरपुर (पूर्व)को नवलपुरको गैंडाकोटमा रहेको मौलाकालिका मन्दिरमा जावतजावतका लागि बनाइएको गैंडाकोट–मौलाकालिका केबलकार सञ्चालनमा आएको छ । नयाँ वर्ष २०८० को सुरुवातको अवसरमा पारेर शुक्रबारदेखि संचालनमा ल्याइएको हो । 

केबलकारको उद्घाटन आज बिहान ६ बजे गैंडाकोट नगरपालिका–६ निवासी एक सय वर्षीया सरस्वती कँडेललाई चढाएर गरेका छन् । कँडेललाई तल्लो स्टेशन र प्रमुख जिल्ला अधिकारी (सीडीओ) कृष्णप्रसाद लम्साललाई माथिल्लो स्टेशनबाट यात्रा गराएर विधिवत रुपमा संचालन गरिएको हो । 
केबलकार भाडा अहिलेलाई दुईतर्फी मूल्य ५५० रुपैयाँ तोकिएको छ ।

करिब डेढ अर्ब रूपैयाँको लागतमा होटलसहितको केबलकार संरचना बनेका छन् । यसको दूरी एक हजार दुईसय मिटर लामो रहेको छ । केबलकारमा ६ वटा टावर निर्माण गरिएको छ । रुटमा १२ वटा यात्रु बोक्ने डब्बा (गोन्डुला) र दुईवटा सामान बोक्ने डब्बा राखिएको छ । एउटा डब्बामा एक पटकमा आठ जना यात्रु अटाउने क्षमता छ भने हरेक डब्बा एक स्टेशनबाट अर्को स्टेशन पुग्न पाँच मिनेट लाग्ने कम्पनीले जनाएको छ ।

आईएमई ग्रुपको मुख्य लगानीमा माथिल्लो स्टेशनमा ६० कोठासहितको सुविधा सम्पन्न होटल बन्ने क्रममा रहेको ग्रुपका अध्यक्ष चन्द्रप्रसा ढकालले बताए ।  होटलको टपमा हेलिप्याड, ५ हजार जना अट्ने सभाहल, सय जनासम्म खेल्ख मिल्ने स्वीमिङ्ग पुल निर्माण हुने उनले बताए । 

अहिले केबलकार यात्रामा बालबालिका, विद्यार्थी, जेष्ठ नागरिक र अपाङ्गता भएका यात्रुहरुका लागि भाडामा छुटको व्यवस्था गरिएको छ । ८० वर्षमाथिका वृद्धवृद्धा र ३ फिटभन्दा तलका बालबालिकहरुको लागि भाडा नलाग्ने व्यवस्था गरिएको कम्पनीले जनाएको छ ।