गाउँपालिका अध्यक्षको घर नजिकै राखिएको बम डिस्पोज

२ बैशाख, बुटवल । रूपन्देहीको सियारी गाउँपालिकाका अध्यक्षको घरलाई लक्षित गरी अज्ञात व्यक्तिहरूले राखेको बम डिस्पोज गरिएको छ ।  सियारी गाउँपालिका वडा नम्बर ४ स्थित अध्यक्ष थानेश्वर घिमिरेको घरमा शनिबार बिहान प्रेसर कुकर बम फेला परेको थियो । घिमिरेको घर पछाडि कम्पाउण्ड बाहिरको गेटमा कुकर बम फेला परेको जिल्ला प्रहरी कार्यलय रुपन्देहीले जनाएको छ । 

सिमेन्टको बोराभित्र शंकास्पद वस्तु देखेपछि अध्यक्ष घिमिरेले बिहान साढे ९ बजे प्रहरीलाई खबर गरेका थिए । प्रहरीसहित नेपाली सेनाको टोलीले उक्त बम मध्याह्न साढे १२ बजे डिस्पोज गरेको हो । उनका अनुसार तारजडित प्रेसर कुकरमा ‘खतरा’ लेखेर टाँसिएको पनि थियो। जसमा मधेश पिपुल्स पार्टी नाम लेखेको पर्चासमेत भेटिएको छ । घटनाको थप अनुसन्धान भइरहेको प्रहरीले जनाएको छ ।