किसानको दूधको रकम पचाउने दाउमा डेरी

४ वैशाख, काठमाडौं । मिष्ठान्न भण्डारले दूधको रकम नदिएको विरोधमा किसानहरु विरोधमा उत्रिएका छन् । रुपन्देहीको औद्योगिक बजार बुटवलको कस्तुरी मिष्ठान्न भण्डार र पाठक दूध डेरीले दिनुपर्ने रकम लामो समयसम्म नदिएपछि उनीहरु धर्ना बसेका हुन् ।

रूपन्देहीको सैनामैना नगरपालिका साल्झण्डीस्थित सालझण्डी दूग्ध उत्पादक सहकारी संस्थालाई दूध बेचेका दूधको रकम किसानहरुले पाएका छैनन् । 
लामो समयसम्म दूधको पैसा नदिएर पचाउने षडयन्त्र गरेपछि दबाबका लागि किसानहरु आन्दोलनमा उत्र्रिएको सहकारी संस्थाका अध्यक्ष तिलकराम घिमिरेले बताए ।

कस्तूरी मिष्ठान्न भन्डारले १३ लाख ७० हजार ४ सय रुपैयाँ र पाठक दूध डेरीले ११ लाख ६० हजार रुपैयाँ सहकारीलाई तिर्न बाँकी छ । 

निरन्तर ताकेतापछि चेक दिने तर पैसा नभएको चेक दिएर किसानलाई झुक्काउँदै आएकाले बाध्य भएर अनिश्चितकालीन धर्नामा उत्रिनु परेको  अध्यक्ष घिमिरेले बताए । 

रकम चुक्ता नपाएसम्म किसानहरु धर्नाबाट पछि नहट्ने उनले बताए । उनीहरू पसल अगाडि धर्ना बसिरहेका छन् ।