मानव बेचबिखनको आरोपमा होटल सञ्चालक प्रहरी नियन्त्रणमा

६ वैशाख, काठमाडौं । प्रहरीले मानव बेचबिखन तथा ओसारपसारमा संलग्नताको आरोपमा दाङको देउखुरीस्थित लमहीस्थित बी एण्ड बी होटलका सन्चालकलाई पक्राउ गरेको छ । पक्राउ पर्नेमा होटल सञ्चालक ५४ वर्षीय नुमाराज भुषाललाई सोमबार साँझ पक्राउ गरेको हो । 

पीडितको उजुरीको आधारमा पक्राउ परेका भुषालाई जिल्ला अदालतबाट पाँच दिनको म्याद लिई अनुसन्धान गरिरहेको वडा प्रहरी कार्यालय लमहीले जनाएको छ ।

अभियुक्त भुषालले कामको खोजीमा आएका दुई जना महिलालाई विभिन्न किसिमका प्रलोभन देखाई परपुरुषसँग शारिरीक सम्बन्ध राख्न लगाएर रकम असुलेको र सम्बन्धन राख्न इन्कार गर्दा डर–त्रास र धम्की दिँदै गलत सम्बन्ध राख्न बाध्य पारेको उजुरी प्रहरीमा परेको थियो । भुषालमाथि अनुसन्धान जारी रहेको कार्यालयले जनाएको छ । 

उनीमाथि गएकाे मंसिर महिनाको तेस्राे हप्तादेखि चैत २७ गतेसम्म होटलमा बोलाएर पटकपटक शारिरीक सम्बन्ध राख्न बाध्य बनाएको आरोप छ ।