कोशी नाम खारेजी आन्दोलनका शहीद पदम लिम्बुको अन्त्येष्टि शनिबार

६ वैशाख,  विराटनगर । प्रदेशको नाम कोशीलाई खारेजीको माग गर्दै जारी आन्दोनका क्रममा निधन भएका पदमबहादुर लिम्बूको शव आउँदो शनिबार अन्त्येष्टि गरिने भएको छ । लिम्बूलाई सरकारले शहीद घोषणा गरिसकेको छ । 

प्रदेशसभाकोा गएको फागुन १७ मा बसेको बैठकबाट गरिएको कोशी प्रदेश नामांकनलाई हटाएर पहिचान र सामाथ्र्यको आधारमा नामाकरणको माग गर्दै भएको आन्दोलनका क्रममा गएको चैत ५ गते विराटनगरमा प्रहरीको दमनमा परी सख्त घाइते ४२ वर्षीय लिम्बूको उपचारका क्रममा चैत १० मा धरानस्थित बीपी अस्पतालमा निधन भएको थियो ।

पहिचानवादी एवं आन्दोलनकारीहरुले भने कोशी नाम खारेज नभएसम्म अन्त्येष्टि नगर्ने अडान लिँदै आइरहेका बेला परिवारजनको अनुरोधमा सम्मानसाथ अन्त्येष्टि गर्न लागिएको संघीय लोकतान्त्रिक राष्ट्रिय मञ्चकी केन्द्रीय उपाध्यक्ष विष्णु तुम्बाहाङ्फेले जानकारी दिइन् । मोरङको बेलबारी(२ लालभित्ती घर भएका लिम्बू धरान बस्दै आएका थिए । 

सरकारले गत २४ चैतमा शहीद घोषणा गर्दै उनको परिवारलाई १० लाख राहत दिने निर्णय गरेको थियो । पहिचानवादी आन्दोलनमा लिम्बू सङ्घीय लोकतान्त्रिक राष्ट्रिय मञ्च सम्बद्ध लिम्बुवान भोलेन्टियरका केन्द्रीय सहकमान्डर थिए ।

पहिचान पक्षधर दल र जातीय संस्थाहरूले प्रदेशको पुन नामांकनको माग गर्दै प्रदर्शन जारी राखेका छन् । प्रदेशको नाम पहिचानको आधारमा नभएसम्म सम्म आन्दोलनबाट पछि नहट्ने उनीहरुको भनाइ छ ।