चितवन २ मा जितनारायणलाई विजयी गराउन नेता सिंहको आह्वान

६ वैशाख, चितवन ।  नेपाली कांग्रेसका नेता एवं सांसद प्रकाशमान सिंहले चितवन–२ को उपनिर्वाचनमा जनताले विवेक प्रयोग गरेर मतदान गर्ने बताएका छन् । 

बुधवार चितवनको चुनावीसभामा धारणा राख्दै नेता सिंहले जनताले आवेग नभई विवेक प्रयोगमाफृत मतदान गरी कांग्रेसका जितनारायण श्रेष्ठलाई विजयी गराउने बताए  । श्रेष्ठ विजयी हुँदा लोकतन्त्रवादीको जित हुने उनले दाबी गरे । गठबन्धनका साझा उम्मेदवारको जित नै लोकतन्त्रवादीहरूको हुने धारणा राखे । 

उनले चितवनको विकास र संवृद्धिका लागि यसपटक गठबन्धनका उम्मेदवारलाई जिताउनेमा आफू विश्वस्त रहेको समेत बताए । उनले पार्टीका नेता कार्यकर्तालाई नागरिकमा देखिएको निराशाका बीचमा आशा जगाउँदै जनजीवन सहज गराउनतिर लाग्नुपर्ने बताए । श्रेष्ठलाई भारी मतले विजयी गराउन उनले मतदातासँग आह्वान गरे ।

चुनावी सभामा कांग्रेस केन्द्रीय सदस्य एवं सांसद रामहरि खतिवडाले जनताको माझमा परिचित उम्मेदवारलाई जिताउन चितवन २ का मतदातासँग आग्रह गरे । 

उम्मेदवार श्रेष्ठ आफू जनताको सुख दुःखमा सधैँ रहने र भ्रष्टाचारका विरुद्धमा निरन्तर लड्ने प्रतिबद्धता व्यक्त गरे । चर्का कुरा गर्नेलाई नभई धेरै नबोल्ने तर काम गर्ने व्यक्ति जितनारायणलाई जिताउन अपिल गरे ।

यही वैशाख १० मा चितवन २, बारा २ र तनहुँ १ मा प्रतिनिधिसभा सदस्यका लागि उपनिर्वाचन हुँदैछ । चितवन २ कांग्रेसका श्रेष्ठ, रास्वपाका रबि लामिछाने र एमालेका सुरेन्द्र न्यौपानेबीच मुख्य प्रतिस्पर्धा हुने भएको छ ।