मेरो नागरिकतामाथि षडयन्त्रपूर्वक प्रश्न उठाइयो : सांसद बडु

६ वैशाख, काठमाडौं । नेपाली कांग्रेसका सांसद दिलेन्द्र बडुले बुधबार बसेको प्रतिनिधिसभाको विशेष समयमा बोल्दै आफूमाथि दुराशयपूर्ण तवरबाट समाचार प्रकाशस भइरहेको भन्दै आपत्ति जनाएका छन् । 

बैठबमा बोल्दै सांसद बडुले केही दिनदेखि आफ्नो नागरिकतामाथि प्रश्न उठाउँदै आधार र तथ्यहीन समाचार भइरहेको भन्दै त्यसमा संलग्नहरुमाथि छानबिन गर्न सम्बन्धित निकायको समेत सभामुखमार्फत ध्यानाकर्षण गराए । 

केही देखिपहिले एक दैनिक पत्रिकामा बडु पूर्वप्रधानमन्त्री पुत्री लगायतको नागरिकतामाथि छानबिनको माग गर्दै गृहमा उजुरी परेको समाचार प्रकाशित भएको थियो । सो विषयलाई लिएर उनले समाचारको पुष्टि गर्न चुनौति दिए ।

‘सिन्धुलीका युवराज भन्नेले व्यक्तिले नेताहरुको नागरिकता छानबिन गर्न भनी दिएको भनिएको उजुरीमा मेरो नाम समेत उल्लेख गरिएको प्रति मेरो गम्भीर आपत्ति छ’ उनले भने, ‘धेरै पटक सांसद र मन्त्रीको जिम्मेवारी निभाइसकेको अवस्थामा मेरो नागरिकमाथि नै प्रश्न उठाएर देश र जनतामाथि षडयन्त्रपूर्ण तरिकाले अविश्वास पैदा गराउने गलत काम भएको छ, यसप्रति खेद व्यक्त गर्दै यसमा सरकारको ध्यान जाओस् ।’