बुढीगण्डकी आयोजना तत्काल सुरु गर्न एकीकृत समाजवादीको माग

६ वैशाख, काठमाडौं । सत्तारुढ दल नेकपा (समाजवादी)ले बुढी गण्डकी आयोजना निर्माण तत्काल सुरु गर्न माग गरेको छ । बुधबार बसेको प्रतिनिधिसभाको बैठकमा बोल्दै एकीकृत समाजवादीका सांसद राजेन्द्रप्रसाद पाण्डेले बुढीगण्डकी आयोजना तत्काल निर्माण सुरु गर्न माग गरे । 

उनले आयोजना लागि इन्धनमै प्रतिलिटर तोकेर रकम उठाएको र त्यो रकम एक खर्ब नाघिसकेको जनाउँदै आयोजना निर्माण सुरु गर्ने प्रतिवद्धता जनाउन सरकारको नाममा रुलिङ गर्न सभामुखलाई पनि आग्रह गरे । 

गोरखा र धादिङको सीमानामा बुढीगण्डकी नदीमा बन्ने १२ सय मेगावाटको जलासययुक्त आयोजनाको विस्तृत परियोजना प्रतिवेदन तयार भइसकेको र वातावरणीय प्रभाव मूल्यांकन प्रतिवेदन पनि स्वीकृत भइसकेको भन्दै उनले निर्माण कार्य सुरु नगर्नुले भ्रष्टाचारको संकेत दिएको बताए । 
गर्न माग गरे ।

उक्त आयोजना निर्माणका लागि अब २ खर्ब ६० अर्ब भए पुग्ने र सरकारले यही आयोजनाका लागि भनेर पेट्रोलियम पदार्थमार्फत १ खर्ब रुपैयाँ भन्दा बढी संकलन गरिसकेको जानकारी पाण्डेले सदनमा गराए ।  बुढीगण्डकी आयोजनाका लागि पेट्रोलियम पदार्थबाट संकलन गरेको रकम सरकारले अन्यत्र लगानी गरेकामा असन्तुष्टि जनाउँदै उनले तत्काल निर्माण अघि बढाउन माग गरे ।

आयोजनाको मुआब्जा वितरणमा सरकारले ४१ अर्ब रुपैयाँ खर्च गरिसकेको भन्दै उनले आयोजना निर्माण भएमा जलविद्युत, पर्यटन र माछापालनबाट लाखौं मान्छेले रोजगारी र व्यवसाय गर्न सक्ने बताए ।

उनले प्रधानमन्त्रीले गोरखामा आयोजित खेलकुद कार्यक्रममा बुढीगण्डकी आयोजना सुरु गछौं भनेको आफूले सुनेको भन्दै उनले भने ‘त्यहाँ बोल्नुभन्दा प्रतिनिधिसभामा बोलेको भए हुन्थ्यो नि ।’