वायु सेवा निगमद्वारा ऋणको ब्याज र हर्जाना छुटका लागि पत्राचार

७ वैशाख, काठमाडौं । नेपाल वायु सेवा निगमले ऋणदाताहरूसँग ब्याज, हर्जाना र पेनल छुट गरिदिन पत्राचार गरेको छ ।

निगमका प्रवक्ता रमेश पौडेलले बिहीबार एक प्रेस विज्ञप्ति जारी गर्दै ऋणमा ब्याज, हर्जाना र पेनल छुट गरिदिन कर्मचारी सञ्चय कोष र नागरिक लगानी कोषलाई अनुरोध पत्र पठाइसकिएको जानकारी दिएका छन् । 

२०७९ को अषढदेखि सोही सालको चैत मसान्तसम्ममा निगमले दुवै कोषलाई गरी किस्ता रकम जम्मा २ अर्ब ९ करोड २८ लाख ६५ हजार ८ सय ४४ रुपैयाँ भुक्तानी गरिसकेको र बाँकी किस्तामा ब्याज छुट दिन अनुरोध गरिएको छ ।

कोरोना महामारीको कारणले व्यापारमा प्रतिकूल असर परेको भन्दै  निगमले सो अवधिको ब्याज, हर्जाना र पेनल छुट गरी सहयोग गरिदिन अनुरोध गरिएकाे हाे । साथै किस्ता संख्या पनि बढाउन अनुरोध गरिएकाे छ ।

ऋणको किस्ताबाफत गत चैत ३० गते कर्मचारी सञ्चय कोष र नागरिक लगानी कोषलाई ५३ करोड ९ लाख ५५ हजार २८१ रुपैयाँ भुक्तानी गरेको छ ।
विज्ञप्तिमा निगमको व्यवस्थापन वर्तमान नेतृत्वले सम्हालेदेखि सुधार हुँदै गएको समेत जनाइएको छ । यसबारे कोषसँग छलफल भइरहेको जनाइएको छ ।

देशभरका उद्योगी व्यवसायीहरु पनि केही महिनादेखि ऋणको ब्याज, हर्जानामा छुटको माग गदै ब्याज र किस्ताको अवधिको बढाउन आन्दोलन गर्दै आइरहेका छन् ।