झारफुकका नाममा यातना दिएर बालिकाकाे हत्या आरोपी ‘माता’ जेल चलान

७ वैशाख, काठमाडौं । झारफुक गरेर बिसेक पारिदिने नाममा बालिकालाई यातना दिएर हत्या गरेको अभियोगमा पक्राउ परेकी ‘माता’लाई जिल्ला अदालत रुपन्देहीले पुर्पक्षका लागि थुनामा राख्न आदेश दिएको छ ।

रुपन्देहीको सैनामैना नगरपालिकामा करिब डेढ महिनाअघि माता भनिने सोनिया रेश्मीले बालिकालाई रोग निको पार्ने भन्दै झारफुकका नाममा चरम यातना दिँदा बालिकाको मृत्यु भएको थियो ।

जिल्ला अदालतले उक्त घटनाका मुख्य अभियुक्त सोनियालाई मुद्दाको अन्तिम टुंगो नलाग्दासम्मका लागि कारागार थुनामा राख्न बुधबार आदेश दिएको हो । उनीसँगै पक्राउ परेका अन्य ४ जनालाई धरौटी र १३ जनालाई साधारण तारेखमा रिहा गरेको छ । 

सैनामैना नगरपालिका–१० फुलबारी टोल निवासी १४ वर्षीया सीता ज्ञवालीको यातनाका क्रममा गत फागुन २० गते राति मृत्यु भएको थियो । घटना लगत्तै प्रहरीले मातासहित १८ जनालाई पक्राउ गरी अनुसन्धान अघि बढाएको थियो । मृत्यु भएकी सीताको राति कपिवस्तुको लक्ष्मणघाटमा दाहसंस्कार गरिएको थियो । तर २१ गते नै माताको चरम यातनाबाट सीताको मृत्यु भएको भिडियो सामाजिक संजालमा सार्वजनिक भएपछि प्रहरीले उनीहरुलाई पक्राउ गरेको थियो ।

उक्त घटनामा प्रत्यक्ष संलग्न रहेकी माता भनिने सोनियासहित बाबु तारा ज्ञवाली र आमा लिला छिमेकी तथा आफन्त गरी १८ जनालाई प्रहरीले पक्राउ गरी मुद्दा चलाएको थियो ।