विराटनगरमा खुल्ला रूपमा माछामासु बिक्री गर्न राेक लगाइँदै

७ वैशाख, विराटनगर । विराटनगर महानगरपालिकाले महानगर क्षेत्रभित्र यही वैशाख १५ गतेदेखि खुला रुपमा माछा–मासु बिक्री वितरण गर्न निषेध गर्ने जनाएको छ । 

पशु बधशाला तथा मासु जाँच ऐन–२०५५ ले खुल्ला रूपमा पशुपंक्षीलाई बध गर्न र बिक्री वितरण कार्यमा प्रतिबन्ध लगाउने निर्णय गरेको हो । खुला रुपमा गरिने मासुजन्य वस्तुका कारण मानव स्वास्थ्यमा गम्भीर असर पर्नुका साथै बजारको सौन्दर्यकरणमा समेत ह्रास आएको महानगरको तर्क छ । 

प्रदेशको राजधानीसँगै कोशी प्रदेशको एकमात्रै महानगरपालिका भएकाले पनि विराटनगरलाई व्यवस्थित गर्नु जरुरी रहेको मेयर नागेश कोइरालाले बताए । 

विराटनगरभित्र प्रवेश गर्ने जोकोहीले आफू साँच्चिकै महानगरभित्र छिरेको महसुस उरुन् भन्ने उद्देश्यबाट महानगरले काम गरिरहेको उनले बताए । विराटनगर क्षेत्रलाई सफा, सुन्दर र व्यवस्थित बनाउने दायित्व सबैको उनको भनाइ छ । 

माछा–मासुको बिक्री वितरणलाई व्यवस्थित बनाउने महानगरको अभियानमा सहयोग पुर्याउन उनले महानगरवासीसँग आग्रहसमेत गरेका छन् । 
महानगरले सरसफाई, फुटपाथ नियन्त्रण, कर संकलन, नो पार्किङलगायतका अभियान जारी राखेको छ । यही वैशाख १५ गतेदेखि लागू हुनेगरी सार्वजनिकस्थल, खुल्ला ठाउँ, तोकिएको स्थान र क्षेत्रका साथै व्यवस्थित पसलहरूमा बाहेक पशुपंक्षी बध गर्न निषेध गरिने महानगरका प्रमुख प्रशासकीय अधिकृत विष्णुप्रसाद कोइरालाले बताए । 

यसबाट साप्ताहिक हाटबजारका साथै सडक छेउछाउ र चोकहरूमा खाट, टेबल, प्लाष्टिक ओछ्याएर भुइँमा राखेर खुल्ला रूपमा माछामासु बिक्री गर्न रोक लाग्नेछ । 

महानगरको निर्णय कार्यान्वयनमा बाधा पु्रयाउने र अटेर गरेर खुल्ला ठाउँमा माछामासु बिक्रीवितरणका साथै पशुपंक्षी बध गरेको पाइएमा कडा कारबाही गरिने उनले बताए ।