१५ दिनभित्र माग पूरा नभए फोहोरको ढुवानी रोक्ने चेतावनी

७ बैशाख, काठमाडौं । सिंहदरवार र राष्ट्रपति कार्यालयको फोहोर नउठाउने काठमाडौं महानगरपालिकाको अन्य दुई स्थानीय तहले काठमाडौंबाट सिसडोल डम्पिङ साइडमा जाने फोहोर ढुवानी नै रोक्ने चेतावनी दिएका छन् नुवाकोट र धादिङका स्थानीय तहका जनप्रतिनिधिले काठमाडौं उपत्यकाको फोहोरको ढुवानी रोक्ने चेतावनी दिएका हुन् । 

आफूहरूका माग १५ दिनभित्र पूरा नभए फोहोरको ढुवानी रोक्ने उनीहरूको चेतावनी छ । नुवाकोटको ककनी गाउँपालिकाका अध्यक्ष र धादिङको धुनिबेँसी नगरपालिकाका प्रमुखले संयुक्त विज्ञप्ति जारी गर्दै माग पूरा गर्न दबाब दिएका हुन् । माग पूरा नभए दुवै स्थानीय तहको कार्यपालिका बैठकबाट निर्णय गरी फोहोरको ढुवानी बन्द गराइने विज्ञप्तिमा उल्लेख छ ।
 
यसअघिको सम्झौता कार्यान्वयन गर्नुपर्ने, न्यून प्रभाव पर्ने गरी फोहोरमैला व्यवस्थापन गर्नुपर्ने, फोहोर व्यवस्थापनस्थल सिसडोल र बन्चरेडाँडाको ईआईएका बारेमा जानकारी गराउनुपर्ने, बन्चरेडाँडाबाट निस्किएको फोहोरको लिच्चडलाई कोल्पुखोलामा मिश्रण नगरी अन्यत्र कुनै स्थानमा व्यवस्थापन गर्नुपर्नेलगायत माग गरिएको छ ।

विज्ञप्तिमा ककनीका अध्यक्ष सुमन लामा र धुनिबेँसीका प्रमुख बालकृष्ण आचार्यले हस्ताक्षर गरेका छन् । यही वैशाख ५ गतेको मिति उल्लेख विज्ञप्ति बिहीबार सार्वजनिक गरिएको छ ।