मेयर राईको निर्देशनः ‘बैठक बहिष्कार गर्ने वडाध्यक्षहरुले तत्काल राजीनामा दिएर बाटो खुला गर्नुस्’

७ वैशाख, काठमाडौं । सुनसरीको धरान उपमहानगरपालिकाका मेयर हर्कराज राईले कार्यपालिकाको बैठक बहिष्कार गर्ने पालिका सदस्य एवं वडाध्यक्षहरूलाई तत्काल पदबाट राजीनामा दिएर बाटो खुला गर्न निर्देशन दिएका छन् । 

उनले सदस्यहरुले पटक–पटक कार्यापालिका बैठक बहिष्कार गरेर पालिकाको विकास योजना र निर्माण कार्यलाई प्रभावित तुल्याउने भएको र यसबाट धरानवासीको उद्देश्यमा ठेस पुगेको भन्दै उनीहरुलाई तत्काल राजीनामा दिन बिहीबार एक विज्ञप्ति जारी गरेर निर्देशन दिएका छन् । 

‘कसैले ‘म बैठक बस्दिन’ भन्न पाइँदैन त्यसैले कर्तव्य पुरा नगरेको र जनताको काम गर्न असक्षम भएको घोषणा गर्दै बैठक बहिष्कार गर्ने जति सबैले नैतिकताको आधारमा तुरुन्तै राजीनामा दिएर बाटो प्रशस्त बनाई आम धरानबासी जनता र लोकतन्त्रलाई सहयोग गर्न अनुरोध छ’ मेयर राईले जारी गरेको प्रेस विज्ञप्तिमा उल्लेख छ । 

वडाहरूमा के–कस्ता योजना, कार्यक्रम सम्पन्न भए भन्ने जानकारी मागेको कुरालाई असहमति राखिरहनु पर्ने कुनै कारण नभएको र यसबाट कामकारवाहीबारे सूचना पाउने अधिकारको समेत उल्लंघन भएको उनको तर्क छ । 

उपमहानगरपालिकाको बैठक संचालन कार्यविधि २०७४ विपरीत कुन एजेण्डामा कसले कति समय बोल्ने भन्नेबारे समय निर्धारणा गर्न पाउने मेयरको निर्देशन नमान्ने र ‘बोल्छु के गर्छस्’ भनेर बैठकमा सदस्यहरुले भाँडभैलो मच्चाएको आरोप उनको छ । वडाध्यक्षहरु पालिका सदस्य हुने व्यवस्था छ । पालिकाको बैठकमा उपस्थित हुनु कसैको चाहना र रहर नभएको बताउँदै उनले बैठकमा उपस्थित हुने कुरा निर्वाचित जनप्रतिनिधिहरुको बाध्यकारी कर्तव्य भएको उल्लेख गरेका छन् । उनले बैठक बहिष्कार गर्नेहरुको कार्यप्रति खेत समेत प्रकट गरेका छन् । 

वडाहरुमा के कस्ता, के कति काम भएका छन् तुरुन्तै सार्वजनिक गर्न वडाध्यक्षहरुलाई निर्देशन पनि दिएका छन् । उनले बैठक बस्दिन भन्न नपाइने स्पष्ट पार्दै कर्तव्य पूरा गर्न नसकेको र जनताको काम गर्न असक्षम भएको घोषणा गरेर नैतिकताको आधारमा पदबाट राजीनामा दिन भनेका छन् ।