सुनकोशी–मरिन डाइभर्सनको काम १८ दिन देखी ठप्प

८ बैशाख, सिन्धुली । सुनकोशी मरिन डाइभर्सनमा १८ दिनदेखि सुरुङ खन्ने काम ठप्प भएको छ । सुक्खा माटो खसेर टनेल बोरिङ मेसिन टीबीएम मेसिन पुरिएपछि १८ दिनदेखी काम ठप्प भएको हो ।

आयोजनाका प्रमुख मित्र बरालका अनुसार टनेल बोरिङ मेसिन पुरिएर काम ठप्प भएपछि बाइपास सुरुङ बनाएर आयोजनाको काम सुचारु गर्ने प्रयास भइरहेको छ । 

सो बाइपास सुरुङ बनाउनका लागि पनि कम्तिमा ७ दिन लाग्ने हुदाँ झन्डै एक महिनासम्म आयोजनाको काम ठप्प हुनेछ । ‘सुख्खा माटो झरेर टीबीएम सुरुङ भित्र पुरिएपछि त्यसलाई निकाल्न बाइपास सुरुङ खनेर निकाल्ने प्रयास गरिरहेका छौं, भित्र माटो खस्ने क्रम अझै जारी रहेकाले समस्या भइरहेको छ, यद्धपी बाइपास सुरुङ खनेर टीबीएम निकाल्नका लागि कम्तिमा एक हप्ता लाग्ने अनुमान गरी काम गरिरहेका छौं’ उनले भने । 

यसअघि पनि सुख्खा माटो खसेर टीबीएम सञ्चालनमा समस्या भएपछि ९ दिन लगाएर बाइपास सुरुङ खनी काम सुचारु गरिएको थियो ।  हाल ४.६६ किलोमिटर सुरुङ खनि सकिएको छ ।